കൊച്ചി: ഐഎസ്എല്ലിൽ ഏഴാം ജയത്തിനായി കേരളാ ബ്ലാസ്റ്റേഴ്‌സ് ഇന്ന് കൊച്ചിയിൽ ഇറങ്ങുന്നു. വൈകിട്ട് എട്ട് മണിക്ക് ആരംഭിക്കുന്ന മത്സരത്തിൽ കരുത്തരായ മുംബൈ സിറ്റിയാണ് എതിരാളികൾ. നിലവിൽ പോയിന്റ് പട്ടികയിൽ രണ്ടാം സ്ഥാനത്തു നിൽക്കുന്ന ബ്ലാസ്റ്റേഴ്സിന്റെ പ്രധാന ലക്ഷ്യം ഇന്നത്തെ മത്സരം ജയിച്ച് ഒന്നാം സ്ഥാനം നേടുക എന്നതാണ്. എന്നാൽ നായകൻ അഡ്രിയാൻ ലൂണയുടെ പരിക്ക് ഭേദമാവാത്തതിനാൽ താരത്തിന്റെ അഭാവം ടീമിനെ പ്രതികൂലമായി ബാധിക്കുമെന്ന കാര്യത്തിൽ സംശയമില്ല. കൂടാതെ റഫറിയിങ്ങിനെ വിമർശിച്ചതിന് വിലക്ക് ലഭിച്ച കോച്ച് ഇവാൻ വുകുമനോവിച്ച് തിരികെ വരുന്ന മത്സരം കൂടിയാണ്.

അഡ്രിയാൻ ലൂണയുടെ അഭാവത്തിൽ മാർകോ ലെസ്കോവിച്ചാണ് ടീമിനെ നയിക്കുന്നത്. പരിക്ക് ഗുരുതരമായതിനാൽ തന്നെ ലൂണയ്ക്ക് സീസണിലെ മത്സരങ്ങൾ നഷ്ടമായേക്കുമെന്നാണ് സൂചന. നായകന്റെ അഭാവം ഉണ്ടെങ്കിലും കൊച്ചിയിൽ നടന്ന ആറ് മത്സരങ്ങളിലൊന്നിൽ പോലും തോൽവിയറിഞ്ഞിട്ടില്ലെന്നത് ബ്ലാസ്‌റ്റേഴ്‌സിന്റെ ആത്മവിശ്വാസം വർദ്ധിപ്പിക്കുന്നുണ്ട്. ദിമിത്രിയോസ് ഡയമന്റക്കോസും ക്വാമി പെപ്രയും പ്രബീർ ദാസുമെല്ലാം മികച്ച പ്രകടനം കാഴ്ച വെക്കുകയാണെങ്കിൽ ബ്ലാസ്റ്റേഴ്സിന് ജയം ഉറപ്പിക്കാം.

അതേസമയം മോഹൻ ബഗാനെതിരെ നടന്ന കഴിഞ്ഞ കളിയിൽ മുംബൈയുടെ നാല് താരങ്ങളാണ് ചുവപ്പ് കാർഡ് കണ്ട് പുറത്തിരിക്കുന്നത്. ചുവപ്പ് കാർഡ് കണ്ട ​ഗ്രെ​ഗ് സ്റ്റുവർട്ട്, ആകാശ് മിശ്ര, വിക്രം പ്രതാപ് സിം​ഗ്, രാഹുൽ ഭേ​ക്കേ എന്നിവർ ​ഇന്ന് ബ്ലാസ്റ്റേഴ്സിനെതിരെ കളത്തിലിറങ്ങില്ല. പത്ത് കളിയിൽനിന്ന് 20 പോയന്റോടെ പട്ടികയിൽ രണ്ടാംസ്ഥാനത്താണ് ബ്ലാസ്റ്റേഴ്സ്. ഒമ്പത് കളിയിൽ 19 പോയന്റുള്ള മുംബൈ നാലാംസ്ഥാനത്തും തുടരുന്നു.