കരൾ രോ​ഗം മൂർച്ഛിച്ച് മരണത്തിന്റെ വക്കോളം എത്തി അവിടെ നിന്ന് തിരികെ എത്തിയ ബാല അടുത്തിടെയാണ് വീണ്ടും സജീവമായത്. തന്റെ നാൽപ്പത്തിയൊന്നാം പിറന്നാൾ‌ ആഘോഷിച്ചതിന്റെ വീഡിയോ ബാല പങ്കുവച്ചിരുന്നു. സുഹൃത്തുക്കൾക്കൊപ്പമാണ് ബാല പിറന്നാൾ ആഘോഷിച്ചത്. എന്നാൽ ഭാര്യ എലിസബത്ത് കൂടെ ഉണ്ടായിരുന്നില്ല. കഴിഞ്ഞ കുറച്ച് നാളുകളായി എലിസബത്ത് ബാലയ്ക്കൊപ്പമില്ല. ജോലിക്കായി കേരളം വിട്ട് വന്നിരിക്കുകയാണ് താനെന്ന് എലിസബത്ത് പറയാറുണ്ടെങ്കിലും എവിടെയാണ് ജോലി ചെയ്യുന്നതെന്ന് എലിസബത്ത് ഇതുവരെയും വെളിപ്പെടുത്തിയിട്ടില്ല. സ്വന്തം യുട്യൂബ് ചാനൽ വഴി വിശേഷങ്ങളെല്ലാം എലിസബത്ത് പങ്കുവയ്ക്കാറുമുണ്ട്.

ഇപ്പോഴിതാ അടുത്ത കുറച്ചു നാളുകളായി ബാലയുടെ വീഡിയോകളിൽ എന്തുകൊണ്ടാണ് എലിസബത്തിനെ കാണാത്തത് എന്ന ചോദ്യത്തിന് മറുപടി നൽകുകയാണ് ബാല. ‘എലിസബത്ത് ഗോൾഡാണ്. എന്റെ കൂടെയില്ല. ഞാനും അവളുടെ കൂടെയില്ല. വിധി. അവളുടെ പോലത്തെ സ്വഭാവമുള്ള ഒരു പെണ്ണിനെ കണ്ടിട്ടില്ല. ഷീ ഈസ് ഗോൾഡ്. ഇതിന്റെ മേലിൽ ചോദിക്കണ്ട.സ്‌നേഹം എന്നത് ചിത്രശലഭം മാതിരി. തന്നെ വരും. പിടിക്കാൻ പറ്റത്തില്ല. ഞാൻ മരിച്ചാലും അവരെക്കുറിച്ച് ഒരു കുറ്റവും പറയില്ല. ഞാൻ കഷ്ടപ്പെട്ടപ്പോഴും എന്റെ കൂടെയുണ്ടായിരുന്നു. ബട്ട് വിധി. അതിലേക്ക് ഞാൻ പോകുന്നില്ല.’- ബാല വ്യക്തമാക്കി.