തിരുവനന്തപുരം: ബിനു ബി കമലിനെ ഇന്ന് കോടതിയിൽ ഹാജരാക്കും. ബസ് യാത്രക്കിടെ സഹയാത്രികയെ കടന്നുപിടിച്ചതിനെ തുടർന്ന് പോലീസ് കസ്റ്റഡിയിലാണ് കോമഡി താരം. ബുധനാഴ്ച തിരുവനന്തപുരത്തു നിന്ന് നിലമേലേക്ക് പോകുന്നതിനിടെയാണ് താരം മോശമായി പെരുമാറിയത്. ഇയാൾ യുവതിക്ക് നേരെ ലൈംഗിക അതിക്രമം കാണിച്ചുവെന്നാണ് പരാതി. ശല്യം സഹിക്ക വയ്യാതെ യുവതി ബഹളം വെക്കുകയായിരുന്നു. തുടർന്ന് ബസിൽ നിന്നും ഇറങ്ങി ഓടിയ ഇയാളെ പിന്നീടാണ് വട്ടപ്പാറ പോലീസ് കസ്റ്റഡിയിൽ എടുത്തത്

ബുധനാഴ്ച വൈകുന്നേരമാണ് കേസിനാസ്പദമായ സംഭവം. ഇരുപത്തൊന്നുകാരിയായ കൊല്ലം കടയ്ക്കൽ സ്വദേശിനിയാണു പരാതിക്കാരി. വട്ടപ്പാറ ഭാഗത്ത് എത്തിയപ്പോൾ താരം തൊട്ടടുത്ത സീറ്റിൽ വന്നിരിക്കുകയും യുവതിയുടെ ദേഹത്ത് സ്പർശിക്കുകയും ആയിരുന്നു. താരത്തിന്റെ ഉപദ്രവം കൂടിയതോടെയാണ് യുവതി പ്രതികരിച്ചത്. ഇറങ്ങിയോടിയ താരത്തിന്റെ പിന്നാലെ യാത്രക്കാരും നാട്ടുകാരും ഓടിയെങ്കിലും താരത്തെ പിടികൂടാനായില്ല. പിന്നീട് വട്ടപ്പാറ ശീമമുള മുക്കിൽ നിന്നാണ് ഇയാൾ പിടിയിലായത്.

നിരവധി ടെലിവിഷൻ സ്റ്റേജ് പ്രോഗ്രാമുകളിലെ താരമാണ് ബിനു ബി കമൽ. സ്വകാര്യ ചാനലുകളിലെ കോമഡി പരിപാടികളിൽ സ്ഥിര സാന്നിധ്യമാണ് ബിനു. ചില മലയാളം സിനിമകളിലും താരം വേഷമിട്ടിട്ടുണ്ട്. കോമഡി രംഗത്ത് നിറഞ്ഞു നിൽക്കുന്ന ബിനുവിന്റെ ഭാഗത്തു നിന്നും ഉണ്ടായ മോശം പ്രവർത്തിയുടെ ഞെട്ടലിലാണ് ആരാധകർ. താരത്തിന്റെ സാമൂഹ്യ മാധ്യമ അക്കൗണ്ടുകളിൽ അടക്കം വളരെ രൂക്ഷ വിമർശനവുമായി ആളുകൾ രംഗത്ത് വന്നിട്ടുണ്ട്.

Read Also:കോട്ടയത്ത് അമോണിയ ലോറി മറിഞ്ഞു; കിണർ വെള്ളം ഉപയോഗിക്കുന്നത് സൂക്ഷിക്കുക.