ശക്തി സ്വരൂപിണിയായ ദേവി പത്തുനാളത്തെ ഘോരയുദ്ധതിതനു ശേഷംമഹിഷാസുരനെ വധിച്ചതിന്റെ സ്മരണയിലാണ് നവരാത്രി ആഘോഷങ്ങള്‍ കൊണ്ടാടുന്നത്. നവഭാവങ്ങളിലായിരുന്നു ദേവി പോരാടിയത്. അതുകൊണ്ട് തന്നെ ഭാവ-രസ-വര്‍ണ്ണങ്ങളുടെ പൊലിമയാണ് നവരാത്രി. ദേവി അവതരിച്ച ഒന്‍പത് ഭാവങ്ങളിലും ഇന്ത്യയില്‍ ക്ഷേത്രങ്ങളുണ്ടെന്നതാകട്ടെ മറ്റൊരു പ്രത്യേകതയും.

സര്‍വ്വകലകളുടെ അധിപയായ ദേവിയെ നവരാത്രി നാളുകളില്‍ വൃതാനുഷ്ഠാനങ്ങളോടെ ആരാധിക്കുന്നത് ഏറെ ഉത്തമമാണ്. ദേവി ഭക്തന് സമ്പല്‍ സമൃദ്ധിയും ഐശ്വര്യവും പ്രദാനം ചെയ്യുമെന്നാണ് വിശ്വാസം. പ്രായ ലിംഗ ഭേദമന്യേ നവരാത്രി വ്രതം അനുഷ്ഠിക്കാം.

നവരാത്രിയുടെ എട്ടാം നാള്‍ അതായത് ദുര്‍ഗ്ഗാഷ്ടമി നാളില്‍ നടക്കുന്ന പൂജവെപ്പ് ഏറെ വിശേഷപ്പെട്ട ചടങ്ങാണ്. ഈ വര്‍ഷത്തെ പൂജവെപ്പ് 2019 ഒക്ടോബര്‍ 5 ശനിയാഴ്ചയാണ്.വൈകീട്ട് അഷ്ടമിതിഥി വരുന്ന ദിവസമാണ് പൂജവെക്കുക. ദുര്‍ഘാഷ്ടമി ദിനത്തില്‍ പൂജവെക്കുമ്പോഴും വിജയദശമി ദിനത്തില്‍ പൂജയെടുക്കുമ്പോഴും ശ്രദ്ധിക്കേണ്ട ചില കാര്യങ്ങളുണ്ട്,

വൈവിധ്യങ്ങളുടെ നവരാത്രി

അഷ്ടമിനാളില്‍ ഗ്രന്ഥങ്ങള്‍, നൃത്ത-സംഗീത-വാദ്യോപകരണങ്ങള്‍ എന്നിവയാണ് പൂജവെക്കുക. സന്ധ്യാ സമയത്ത് പ്രത്യേക സ്ഥാനത്ത് പൂജ നടത്തിയാണ് ഗ്രന്ഥങ്ങള്‍ പൂജയ്ക്കായി സമര്‍പ്പിക്കേണ്ടത്. കേരളത്തില്‍ എല്ലാ ക്ഷേത്രങ്ങളിലും പൂജവയ്പ്പിനുള്ള സൗകര്യങ്ങള്‍ ഒരുക്കാറുണ്ട്. വീടുകളിലോ സ്ഥാപനങ്ങലിലോ ആണ് പൂജ ഒരുക്കുന്നതെങ്കില്‍ സരസ്വതി, ദുര്‍ഗ്ഗാ ദേവിമാരുടെ ചിത്രത്തിനു മുന്നില്‍ പൂജവെക്കാം.മറ്റ് ഉപാസനാ ദേവതകളുടെ ചിത്രവും ഉപയോഗിക്കാവുന്നതാണ്.

വിദ്യാര്‍ത്ഥികള്‍ അവരുടെ പുസ്തകങ്ങളും പധനോപകരണങ്ങളുമെല്ലാം പൂജക്കുവെക്കണമെന്നാണ് വിശ്വാസം. മുതിര്‍ന്നവര്‍ ഭഗവത്ഗീത, രാമായണം തുടങ്ങിയ പുണ്യഗ്രന്ഥങ്ങള്‍ പൂജയ്ക്ക് വെക്കാവുന്നതാണ്. കലാകാരന്മാര്‍ അവരുടെ കലയുമായി ബന്ധപ്പെട്ട ഉപകരണങ്ങളാണ് പൂജയ്ക്ക് വെക്കുന്നത്. ഉപകരണങ്ങള്‍ വൃത്തിയാക്കിയതിനു ശേഷം വേണം പൂജവെക്കാന്‍.

ആയുധങ്ങള്‍ പൂജയ്ക്ക് വെക്കുന്നത് നവമി നാളിലാണ്. അഷ്ടമി,നവമി നാളുകളില്‍ പൂജയ്ക്കുവെച്ച വസ്തുക്കള്‍ ദശമി നാളിലാണ് പൂജ കഴിഞ്ഞ് എടുക്കുക. ദശമി ദിവസം രാവിലെ വിദ്യാദേവതയായ സരസ്വതിയേയും വിഘ്‌നേശ്വരന്മാരായ ഗണപതിയേയും ദക്ഷിണാ മൂര്‍ത്തിയേയും, നവഗ്രഹങ്ങളേയും, ശ്രീകൃഷ്ണനേയും ഗ്രന്ഥപൂജയില്‍ പ്രാര്‍ത്ഥിക്കണം. കാരണം ബുദ്ധിയുടെ അധിപനായ ബുധനും ഗുരുവും കൃഷ്ണനാണ്.

വീട്ടില്‍ പൂജവെക്കുമ്പോള്‍

കേരളത്തിലെ എല്ലാ ക്ഷേത്രങ്ങളിലും ദുര്‍ഗ്ഗാഷ്ടമി നാളില്‍ പൂജവെപ്പിനുള്ള സൗകര്യമുണ്ട്. എന്നാല്‍ ഇതിനു പുറമേ മിക്ക വീടുകളിലും പൂജവെപ്പ് നടക്കാറുണ്ട്. വീട്ടില്‍ പൂജവെക്കുമ്പോള്‍ ചിലകാര്യങ്ങള്‍ തീര്‍ച്ചയായും ശ്രദ്ധിക്കണം. കാരണം ദേവീ ചൈതന്യം കുടികൊള്ളുന്ന ഇടങ്ങളാണ് ക്ഷേത്രങ്ങള്‍. അതുകൊണ്ട് തന്നെ അതിന്റേതായ ചിട്ടവട്ടങ്ങളും ആരാധനാ ക്രമങ്ങളും ഇവിടെ നിത്യേന നടക്കുന്നതാണ്. എന്നാല്‍ വീടുകളില്‍ ഈശ്വരാരാധന നടക്കുന്നുണ്ടെങ്കിലും ദേവീ ചൈതന്യത്തെ ആവാഹിക്കുകയോ നിത്യപൂജകള്‍ നടത്തുകയോ ചെയ്യുന്നില്ല. എന്നാല്‍ പൂജവെക്കുന്നസമയത്ത് ദേവീചോതന്യത്തെ ആവാഹിക്കുകയും ആരാധനയ്ക്കായി ഇരിപ്പിടം ഒരുക്കുകയും വേണം.

വെറും തറയില്‍ പൂജവെക്കാന്‍ പാടില്ല.നിലത്ത് പട്ടോ മരപ്പലകയോ വിരിച്ച് വേണം പൂജവെപ്പിനുള്ള പീഠം ഒരുക്കാന്‍. പൂജാമുറിയിലോ വീടിന്റെ ഈശാന കോണായ വടക്കു കിഴക്ക് ഭാഗത്തോ പൂജ വെയ്ക്കാം. പൂജവെക്കാനുദ്ദേശിക്കുന്ന ഇടം തുളസീതീര്‍ത്ഥം തളിച്ച് ശുദ്ധമാക്കണം. പൂജാമുറിക്ക് പുറത്താണെങ്കില്‍ ചാണകവെള്ളം തളിച്ചും ശുദ്ധമാക്കാം.

പൂജയ്ക്ക് വെക്കുന്ന വസ്തുക്കള്‍ സരസ്വതീ ദേവിയുടെ ചിത്രത്തിനു മുന്നിലായാണ് വെക്കേണ്ടത്. ദേവിയുടെ ഇടതുഭാഗത്തായി പ്രഥമസ്ഥാനം നല്‍കി സകല വിഘ്‌ന നിവാരകനായ ഗണപതിയെ പ്രതിഷ്ഠിക്കാം. വലതു ഭാഗത്ത് നിങ്ങളുടെ ഇഷ്ടദേവതയേയും പ്രതിഷ്ധിക്കാം. പൂജവെക്കുന്ന സ്ഥലം പൂക്കളാല്‍ അലങ്കരിക്കുന്നത് ഉത്തമമായിരിക്കും പൂമാലചാര്‍ത്തുന്നതും ഉത്തമമായിരിക്കും.ഗണപതിയേയും സരസ്വതിയേയും ഇഷ്ടദേവതയേയും മനസ്സില്‍ ധ്യാനിച്ച് ഒരു പിടി പുഷ്പം ഉപകരണങ്ങളില്‍ അര്‍ച്ചിച്ചതിനു ശേഷം വേണം പൂജവെക്കാന്‍. അവല്‍, മലര്‍, ശര്‍ക്കര, പഴം, കല്‍ക്കണ്ടം, എന്നിവ കൊണ്ട് നിവേദ്യമര്‍പ്പിച്ച ശേഷവും പൂജവെക്കാം.

ഭക്തിയുടെ നിറവില്‍ നവരാത്രി

പൂജവെക്കുന്നവര്‍ രാവിലെയും വൈകീട്ടും ക്ഷേത്രദര്‍ശനവും പ്രാര്‍ത്ഥനകളും നടത്തണം. ഗുരുമുഖത്തു നിന്നും ദേവീ മന്ത്രം ദീക്ഷ സ്വീകരിച്ചിട്ടുള്ളവര്‍ ആ മന്ത്രമുപയോഗിച്ചും അല്ലാത്തവര്‍ ദേവീ സ്‌തോത്രങ്ങളും ജപിക്കാവുന്നതാണ്.

വിജയദശമീ ദിവസം രാവിലെ കുളിച്ചു ശുദ്ധമായ ശേഷം അരച്ചെടുത്ത ചന്ദനത്തില്‍ തുളസിയില തൊട്ട് പൂജയ്ക്കുവെച്ച ഉപകരണങ്ങളില്‍ ചാര്‍ത്തണം. പൂജയെടുത്തതിനു ശേഷം മണലിലോ അരിയിലോ ഓം ഹരിഃ ശ്രീ ഗണപതയേ നമഃ അവിഘ്‌നമസ്തു എന്ന് ഭക്തിയോടെ എഴുതണം. അതിന് ശേഷം പുസ്തകം പൂജവെച്ചവര്‍ അതിന്റെ ഒരുഭാഗം വായിക്കണം. മുതിര്‍ന്നവര്‍ക്ക് പുണ്യഗ്രന്ഥങ്ങള്‍ പകുത്തു വായിക്കാം. ഉപകരണങ്ങള്‍ പൂജവെച്ചവര്‍ ദേവിയ്ക്കു മുന്നില്‍ വെച്ചു തന്നെ ഭക്ത്യാദരപൂര്‍വ്വം അവ ഉപയോഗിക്കുക.

ക്ഷേത്രങ്ങളിലും വീടുകളിലും പൂജവെപ്പ് നടക്കുന്നത് വ്യത്യസ്തമായാണ്. കൃത്യമായ ആരാധനാ ക്രമങ്ങളും പൂജാവിധികളും പിന്‍തുടരുന്ന സമ്പ്രദായമാണ് ക്ഷേത്രങ്ങളിലേത്. അതുകൊണ്ട് തന്നെ ബൃഹത് പൂജാവിധികളാണ് നവരാത്രി നാളുകളില്‍ ക്ഷേത്രങ്ങളില്‍ ഉണ്ടാവുക. വീടുകളില്‍ പൂജവെക്കുമ്പോള്‍ ഏതൊരു സാധാരണക്കാരനും ആചാരിക്കാനാവുന്ന ലഘു പൂജാവിധിയാണ് ഉത്തമം.

Read Also: കയ്യിൽ നിന്നും വെള്ളം തട്ടിപ്പോയോ? ഐശ്വര്യവും പണവും വന്നു ചേരും