മോതിരം അണിയുന്ന വിരലുകൾക്കും ചിലത് പറയാനുണ്ട്

വിരലുകളിൽ മനോഹരങ്ങളായ മോതിരങ്ങൾ അണിയാൻ എല്ലാവർക്കും ഇഷ്ടമാണ്. പത്തുവിരലുകളിലും പലതരത്തിലുള്ള മോതിരം ഇടുന്നവരുണ്ട്. സ്വർണം, വെള്ളി, പ്ലാറ്റിനം, ചെമ്പ് തുടങ്ങിയ ലോഹങ്ങൾ ഉപയോഗിച്ചുള്ള മോതിരങ്ങൾ ആയാലും പ്ലാസ്റ്റിക്കിലും തടിയിലും ഗ്ലാസിലും മറ്റും നിർമ്മിക്കപ്പെടുന്ന മോതിരങ്ങളായാലും മനോഹരമാണ്. സാധാരണയായി ചെറുവിരലിനു സമീപമുള്ള വിരലിലാണ് മോതിരം അണിയാറുള്ളത്. അതുകൊണ്ട് തന്നെ ഈ വിരൽ, മോതിരവിരൽ എന്നും അറിയപ്പെടുന്നു. ഓരോ വിരലിലും മോതിരം ധരിക്കുന്നതിന് ഓരോ ഗുണങ്ങളാണ് ഉള്ളത്. അവ എന്തൊക്കെയാണെന്ന് പരിശോധിക്കാം.

തള്ള വിരൽ

തള്ളവിരലിൽ മോതിരം അണിയുന്നവർ അപൂർവമായിരുന്നു. എന്നാൽ ഇപ്പോൾ ഒട്ടുമിക്കവരും തള്ള വിരലിലും മോതിരമണിയും. എന്നാൽ വലതു കയ്യിലെ തള്ളവിരലിൽ മോതിരം അണിയുന്നത് ആഗ്രഹങ്ങൾ സംബന്ധിച്ച ആശയക്കുഴപ്പത്തെയാണ് സൂചിപ്പിക്കുന്നത്. എന്നാൽ ഇടതുകൈയിലെ തള്ളവിരലിൽ മോതിരം അണിയുന്നത് ആത്മസംഘർഷത്തെ സൂചിപ്പിക്കുന്നു.

ചൂണ്ടുവിരൽ

ചൂണ്ടുവിരലിൽ മോതിരം അണിയുന്നത് ആത്മവിശ്വാസത്തേയും അധികാരത്തേയുമാണ് കാണിക്കുന്നത്. ഇതിന് നല്ല നേതൃഗുണം പ്രദാനം ചെയ്യാനും ആത്മവിശ്വാസം വർദ്ധിപ്പിക്കാനും സഹായിക്കും. കൂടാതെ വലം കൈക്കാര്‍ ഇടം കൈയ്യിലെ ചൂണ്ടുവിരലിലും ഇടംകൈക്കാര്‍ വലതുകൈയ്യിലെ ചൂണ്ടുവിരലിലും മോതിരം ധരിക്കുന്നത് മറ്റുള്ളവരുടെ നേതൃത്വം അംഗീകരിക്കുന്നു എന്നതിനെയാണ് സൂചിപ്പിക്കുന്നത്.

നടുവിരൽ

നടു വിരലിൽ മോതിരമണിയുന്നത് ഉത്തരവാദിത്വത്തെയും സൗന്ദര്യത്തെയും സ്വയം വിശകലനത്തെയുമാണ് സൂചിപ്പിക്കുന്നത്.

മോതിരവിരൽ

മോതിരവിരലിൽ മോതിരം അണിയുന്നത് സൗന്ദര്യം, സര്‍ഗാത്മകത, മറ്റുള്ളവരുമായുള്ള ബന്ധം എന്നിവയെ സൂചിപ്പിക്കുന്നു. സ്ത്രീകളും പുരുഷന്മാരും അവരുടെ വിവാഹമോതിരം മോതിരവിരലിൽ അണിയുന്നതിന് പിന്നിലെ കാരണം ആ വിരൽ പ്രണയവും സ്നേഹവും പ്രതിഫലിപ്പിക്കുന്നു എന്നതിന്റെ സൂചനയാണ്

ചെറുവിരൽ

ചെറുവിരലിൽ മോതിരം അണിയുന്നവര്‍ വിലപേശലിൽ മിടുക്കരായിരിക്കും. ആശയവിനിമയം, ബുദ്ധികൂർമത, അന്തർജ്ഞാനം എന്നിവയെയാണ് ഇത് സൂചിപ്പിക്കുന്നത്. ചെറുവിരലിൽ വെള്ളിമോതിരം ധരിക്കുന്നതാണ് ഉത്തമം. ഇത് കോപത്തെ കുറയ്ക്കാനും സൗന്ദര്യവും വ്യക്തിത്വവും കൂട്ടാനും സഹായിക്കും.