ഐഫോണിന്റെ ഇന്ത്യയിലെ ആദ്യത്തെ ഔദ്യോഗിക റീട്ടെയില്‍ സ്റ്റോറായ ആപ്പിള്‍ ബികെസി ഏപ്രില്‍ 18 ന് പൊതുജനങ്ങള്‍ക്കായി തുറക്കും. തൊട്ടുപിന്നാലെ രാജ്യത്തെ രണ്ടാമത്തെ സ്റ്റോര്‍ ഏപ്രില്‍ 20നും തുറക്കും. ഇന്ത്യയിലെ ഉപഭോക്താക്കള്‍ക്ക് ഏറ്റവും പുതിയ ആപ്പിള്‍ ഉല്‍പന്നങ്ങള്‍ വാങ്ങാനും ഉപയോഗിക്കാനും പുതിയ സ്റ്റോറുകളിലൂടെ സാധിക്കും.
ആപ്പിളിന്റെ ഔദ്യോഗിക ബ്ലോഗ് പോസ്റ്റിലൂടെയാണ് ഇന്ത്യയില്‍ തങ്ങളുടെ ആദ്യത്തെ റീട്ടെയില്‍ സ്റ്റോര്‍ തുറക്കുന്നതായി പ്രഖ്യാപിച്ചത്. മുംബൈയിലെ ആപ്പിള്‍ സ്റ്റോര്‍ ഏപ്രില്‍ 18 ന് രാവിലെ 11 ന് തുറക്കുമെന്ന് കുപെര്‍ട്ടിനോ ആസ്ഥാനമായുള്ള ആപ്പിള്‍ സ്ഥിരീകരിച്ചു, അതേസമയം, കമ്പനിയുടെ രണ്ടാമത്തെ സ്റ്റോറായ ആപ്പിള്‍ സകേത് ഏപ്രില്‍ 20ന് 10 മണിക്ക് ഡല്‍ഹിയിലും തുറക്കും. ആപ്പിള്‍ ഉല്‍പന്നങ്ങള്‍ നേരിട്ട് കണ്ട് വാങ്ങാനും മറ്റു സേവനങ്ങള്‍ ലഭ്യമാക്കാനും ഇതുവഴി സാധിക്കുമെന്ന് ഐഫോണ്‍ നിര്‍മാതാവ് പറഞ്ഞു.
സാകേത് സ്റ്റോറിന്റെ ചിത്രങ്ങള്‍ ഇതിനകം തന്നെ പുറത്തുവന്നിട്ടുണ്ട്. രാജ്യ തലസ്ഥാനത്തുള്ള ഐക്കണിക് ഗേറ്റില്‍ നിന്നും പ്രചോദനം ഉള്‍ക്കൊണ്ട് നിര്‍മിച്ചതാണിത്. എന്നാല്‍ മുംബൈയിലെ ബാന്ദ്ര കുര്‍ള കോംപ്ലക്‌സിലുള്ള മുകേഷ് അംബാനിയുടെ ഉടമസ്ഥതയിലുള്ള ജിയോ വേള്‍ഡ് ഡ്രൈവ് മാളിലാണ് ആപ്പിള്‍ ബികെസി സ്റ്റോര്‍ സ്ഥിതി ചെയ്യുന്നത്. ഐതിഹാസികമായ കാളി പീലി ടാക്‌സി ആര്‍ട്ടില്‍ നിന്ന് പ്രചോദനം ഉള്‍ക്കൊണ്ട് ഡിസൈന്‍ ചെയ്ത മുംബൈ സ്റ്റോറിന്റെ ആദ്യ ചിത്രങ്ങള്‍ ആപ്പിള്‍ കഴിഞ്ഞ ആഴ്ച പുറത്തുവിട്ടിരുന്നു.
ഇന്ത്യയിലെ ആദ്യത്തെ റീട്ടെയില്‍ സ്റ്റോര്‍ തുറക്കുന്നതിനോടനുബന്ധിച്ച് ആപ്പിള്‍ ‘മുംബൈ റൈസിങ്’ എന്ന പേരില്‍ പ്രോഗ്രാം പ്രഖ്യാപിച്ചിട്ടുണ്ട്. മുംബൈയിലെ പ്രാദേശിക സമൂഹത്തെയും സംസ്‌കാരത്തെയും ആഘോഷിക്കുന്നതിനോടൊപ്പം ആപ്പിളിന്റെ ഉല്‍പന്നങ്ങളും സേവനങ്ങളും കൂടുതല്‍ പേരിലേക്ക് എത്തിക്കുകയും ചെയ്യുക എന്ന ലക്ഷ്യത്തോടെയാണ് പ്രോഗ്രാം നടത്തുന്നത്.