TOP NEWS
ഭുവനേശ്വര്‍: പെന്‍ഷന്‍ തുക വാങ്ങാനായി എഴുപതുകാരിക്ക് നടക്കേണ്ടി വന്നത് കിലോമീറ്ററുകള്‍. ഒഡിഷയിലെ നഭരങ്പുര്‍ ജില്ലയിലാണ് സംഭവം. പൊട്ടിയ ഒരു കസേരയും കുത്തിപ്പിടിച്ച് പെന്‍ഷന്‍ തുക വാങ്ങാന്‍ പോകുന്ന കാലില്‍ ചെരുപ്പില്ലാതെ, വീഴാതിരിക്കാന്‍ കസേര മുന്‍പിലായി കുത്തിപ്പിടിച്ചാണ് സൂര്യ ഹരിജന്‍ പെന്‍ഷന്‍ തുക വാങ്ങാനായി നടന്നത്. കനത്ത ചൂടും സഹിച്ചായിരുന്നു ഇത്. നേരത്തെ ഇവര്‍ക്ക് പെന്‍ഷന്‍ കയ്യില്‍ കിട്ടിയിരുന്നു. എന്നാല്‍ ഇപ്പോള്‍ ബാങ്ക് അക്കൗണ്ടിലേക്കാണ് പെന്‍ഷന്‍ ഇടുന്നത്.
വയോധികയുടെ വിഡിയോ സമൂഹമാധ്യമങ്ങളിലും വൈറലായി.
വളരെ കഷ്ടപ്പെട്ട് ബാങ്കില്‍ എത്തിയെങ്കിലും വിരലടയാളം ബാങ്ക് രേഖകളുമായി പൊരുത്തപ്പെടാത്തതിനാല്‍ പണം പിന്‍വലിക്കാന്‍ കഴിഞ്ഞില്ല. അവരുടെ വിരലുകള്‍ക്ക് പൊട്ടലുണ്ടെന്നും പ്രശ്‌നം പരിഹരിക്കാന്‍ നടപടികള്‍ കൈക്കൊള്ളുമെന്നും ബാങ്ക് മാനേജര്‍ അറിയിച്ചു. പെന്‍ഷന്‍ തുകയായ 3000 രൂപ അവര്‍ക്ക് നേരിട്ടെത്തി നല്‍കുമെന്നും അറിയിച്ചു.
വളരെ ദരിദ്രയാണ് സൂര്യ ഹരിജന്‍. മൂത്ത മകന്‍ മറ്റൊരു സംസ്ഥാനത്ത് അതിഥി തൊഴിലാളിയായി ജോലി ചെയ്യുകയാണ്. മറ്റുള്ളവരുടെ കാലികളെ നോക്കി ജീവിതം മുന്നോട്ടു കൊണ്ടുപോകുന്ന ഇളയ മകനൊപ്പം കുടിലിലാണ് സൂര്യ താമസിക്കുന്നത്.
