തിരുവനന്തപുരം: മാലിന്യത്തിൽ നിന്നും വൈദുതി ഉത്പാദിപ്പിക്കുന്ന പദ്ധതി പൂർണ്ണമായും നിർത്തലാക്കി സർക്കാർ. നാല് നഗരങ്ങളിൽ നടപ്പിലാക്കിക്കൊണ്ടിരുന്ന വൻ പദ്ധതിയാണ് ഇപ്പോൾ അവസാനിപ്പിച്ചിരിക്കുന്നത്.

പദ്ധതി അവസാനിപ്പിച്ചു കൊണ്ട് തദ്ദേശ സ്വയംഭരണ വകുപ്പ് ഉത്തരവിറക്കി. കോഴിക്കോട്, കൊച്ചി, കൊല്ലം, തിരുവനന്തപുരം തുടങ്ങിയ നഗരങ്ങളിലെ പദ്ധതികളാണ് നിര്‍ത്തലാക്കിയത്. പദ്ധതിക്കുള്ള നീക്കം ആരംഭിച്ചത് 2017ലാണ്. കരാരിൽ ഒപ്പുവെച്ചത് 2019 സപ്തംബറിലും.സോണ്ട ഇന്‍ഫ്രാടെക് കമ്പനിയായിരുന്നു ഈ കരാര്‍ എടുത്തിരുന്നത്. കെഎസ്‌ഐഡിസി ആയിരുന്നു പദ്ധതിയുടെ നോഡല്‍ ഏജന്‍സി.

പലതവണ കമ്പനിക്ക് സമയം നീട്ടിക്കൊടുത്തിരുന്നെങ്കിലും ആവശ്യമായ ഫണ്ട് സമാഹരിക്കാന്‍ കഴിഞ്ഞില്ല. ബ്രഹ്‌മപുരം തീപിടുത്തത്തിലെ വിവാദ കമ്പനിയായിരുന്ന സോണ്ടയെ സര്‍ക്കാര്‍ കരിമ്പട്ടികയില്‍പ്പെടുത്തിയിരുന്നു. സിപിഐഎം നേതാവ് വൈക്കം വിശ്വന്റെ മരുമകന്റേതായിരുന്നു ഈ കമ്പനി.

രാജ്യത്ത് ഒരിടത്തും വിജയകരമായി നടത്താൻ കഴിയാത്ത പദ്ധതിയായിരുന്നു ഇത്. സോണ്ട കമ്പനിക്ക് വേണ്ടത്ര മുന്‍ പരിചയവും ഉണ്ടായിരുന്നില്ല. കമ്പനിക്കെതിരെ ആദ്യം മുതൽ തന്നെ അഴിമതി ആരോപണം ഉയർന്നിരുന്നു. വികേന്ദ്രീകൃത മാലിന്യസംസ്‌കരണമായിരുന്നു കേരളത്തിന്റെ ലക്ഷ്യം. വേസ്റ്റ് ടു എനര്‍ജി വന്നതോടെ ബ്രഹ്‌മപുരമടക്കം മാലിന്യം കേന്ദ്രീകരിച്ചെത്തി.