ദേശീയ വിദ്യാഭ്യാസ നയത്തിന്റെ ഭാഗമായി രാജ്യത്തെ സ്‌കൂളുകളിലെ മുഴുവന്‍ വിദ്യാര്‍ത്ഥികള്‍ക്കും ഒരേ തരം ഐഡന്റിറ്റി കാര്‍ഡുകള്‍ വിതരണം ചെയ്യുന്ന പദ്ധതിയായ ഒരു രാജ്യം ഒരു ഐഡി കാർഡ് പദ്ധതിക്കുള്ള നടപടിക്രമങ്ങള്‍ ആരംഭിക്കാന്‍ സംസ്ഥാനങ്ങളോടും കേന്ദ്ര ഭരണ പ്രദേശങ്ങളോടും കേന്ദ്രം നിര്‍ദേശം നല്‍കിയത് കഴിഞ്ഞ ദിവസമാണ്. ഓട്ടോമേറ്റഡ് പെർമനന്റ് അക്കാദമിക് അക്കൗണ്ട് രജിസ്ട്രി അല്ലെങ്കിൽ ‘എപിഎആർ’ അവതരിപ്പിക്കുന്നതിനുള്ള നടപടികൾ ആണ് ആരംഭിക്കാൻ പോകുന്നത്. പുതിയ സ്‌കീമിലേക്കുള്ള രജിസ്‌ട്രേഷന്‍ രക്ഷിതാക്കളുടെ സമ്മതത്തോടെയാണ് നടക്കുക. APAAR എൻറോൾമെന്റ് പ്രക്രിയ ആരംഭിക്കുന്നതിന് അതത് അധികാരപരിധിയിലുള്ള എല്ലാ സ്കൂളുകളുടെയും രക്ഷിതാക്കളുടെ സമ്മതം വാങ്ങാൻ മന്ത്രാലയം എല്ലാ സംസ്ഥാനങ്ങൾക്കും അയച്ച കത്തിൽ നിർദ്ദേശിച്ചു.

ഇത് ഒരു വിദ്യാഭ്യാസ ഇക്കോസിസ്റ്റം രജിസ്ട്രി അല്ലെങ്കിൽ ഒരു ‘എഡ്യൂലോക്കർ’ ആണ്. ഇതനുസരിച്ച് പ്രീ-പ്രൈമറി മുതൽ ഉന്നത വിദ്യാഭ്യാസം വരെ ചേരുന്ന ഓരോ വിദ്യാർത്ഥിക്കും APAAR ഒരു പ്രത്യേക തിരിച്ചറിയൽ നമ്പർ നൽകും. ഓരോ വ്യക്തിക്കും നിലവിലുള്ള ആധാർ ഐഡിക്ക് പുറമേയാണിത്. ഈ വർഷം മെയ് മാസത്തിൽ, നാഷണൽ എജ്യുക്കേഷണൽ ടെക്നോളജി ഫോറം (NETF) തലവനും മുൻ AICTE ചെയർമാനുമായ ഡോ. അനിൽ സഹസ്രബുദ്ധെ വിദ്യാർത്ഥികളും അധ്യാപകരും സ്കൂളുകളും കോളേജുകളും ഉൾപ്പെടുന്ന മുഴുവൻ വിദ്യാഭ്യാസ വ്യവസ്ഥയുടെയും ഒരു രജിസ്ട്രി തയ്യാറാക്കുന്നതായി സൂചിപ്പിച്ചിരുന്നു. അതാണിപ്പോൾ നടപ്പാക്കാനൊരുങ്ങുന്നത്.

ഒരു രാജ്യം, ഒരു ഐഡി വിദ്യാർത്ഥികൾക്ക് എങ്ങനെ പ്രയോജനം ചെയ്യും?

APAAR അല്ലെങ്കിൽ EduLocker വിദ്യാർത്ഥികൾക്ക് അവരുടെ അക്കാദമിക് പരമായയും അല്ലാത്തതുമായ നേട്ടങ്ങളെ തടസ്സങ്ങളില്ലാതെ ട്രാക്കുചെയ്യുന്നതിന് സഹായിക്കുന്ന ഒരു ആജീവനാന്ത ഐഡി നമ്പറായിരിക്കും. ഇതിലൂടെ വിദ്യാർത്ഥികൾക്ക് അവരുടെ അക്കാദമിക് നേട്ടങ്ങൾ, കായികപരവും കലാപരവുമായ നേട്ടങ്ങൾ തുടങ്ങി വിദ്യാഭ്യാസകാലത്ത് ഉണ്ടാകുന്ന എല്ലാ സംഭവങ്ങളെയും ഡിജിറ്റലായി സൂക്ഷിക്കാൻ കഴിയും. കൂടാതെ, ഒരു സ്കൂളിൽ നിന്ന് മറ്റൊന്നിലേക്ക് മാറുന്ന വിദ്യാർത്ഥികൾക്ക് രാജ്യത്തിന്റെ ഏത് ഭാഗത്തും ഒരു പുതിയ സ്ഥാപനത്തിലേക്ക് പ്രവേശനം നേടുന്നതിനുള്ള ബുദ്ധിമുട്ടുകൾ ഇത് വരുന്നതോടെ ഇല്ലാതാകും.

എൻറോൾമെന്റ് പ്രക്രിയ എങ്ങിനെ ?

കുട്ടികളിലെ ഇതിലേക്ക് അവരുടെ മാതാപിതാക്കളുടെ സമ്മതത്തോടെ മാത്രമേ എൻറോൾ ചെയ്യിക്കൂ. ഏതുസമയത്തും അവർക്ക് തങ്ങളുടെ ഈ സമ്മതപത്രം പിൻവലിക്കാനും കഴിയുന്നതരത്തിലാണ് ഇതിന്റെ രൂപകൽപ്പന. ഈ വിവരങ്ങൾ ബന്ധപ്പെട്ട സർക്കാർ ഏജൻസികളുമായി മാത്രമേ പങ്കിടൂ എന്ന് സർക്കാർ ഉറപ്പുനൽകിയിട്ടുണ്ട്. ഓരോ വിദ്യാർത്ഥിയുടെയും സ്‌കൂളുകൾ ശേഖരിക്കുന്ന വിവരങ്ങൾ കേന്ദ്രീകൃതമായി പ്രവർത്തിക്കുന്ന ജില്ലാ ഇൻഫർമേഷൻ ഫോർ എജ്യുക്കേഷൻ പോർട്ടലിൽ സൂക്ഷിക്കും. ആധാറിന്റെ ഡാറ്റ സുരക്ഷയെക്കുറിച്ചുള്ള ആശങ്കകളും ഡാറ്റാ ലംഘനങ്ങളുടെ നിരവധി സംഭവങ്ങളും കണക്കിലെടുക്കുമ്പോൾ, APAAR രജിസ്ട്രേഷൻ പ്രക്രിയയുടെ തുടക്കത്തെക്കുറിച്ച് പലരും ആശങ്കകൾ ഉന്നയിച്ചിട്ടുണ്ട്. APAAR രജിസ്ട്രി ചേർക്കുന്നത് ടീച്ചർമാരുടെ ജോലിഭാരം വർദ്ധിപ്പിക്കും എന്നും ആരോപണമുണ്ട്.