ന്യൂയോര്‍ക്ക്: സെര്‍ബിയന്‍ ടെന്നീസ് ഇതിഹാസം നൊവാക് ജോക്കോവിച്ചിന് യുഎസ് ഓപ്പണ്‍ കിരീടം. പുരുഷ സിംഗിള്‍സ് ഫൈനലില്‍ ഡാനിയല്‍ മെദ്വദേവിനെ പരാജയപ്പെടുത്തി. താരത്തിന്റെ നാലാം യുഎസ് ഓപ്പണ്‍ കിരീടമാണിത്. 24-ാം ഗ്രാന്‍ഡ് സ്ലാം വിജയത്തോടെ ഏറ്റവും കൂടുതല്‍ ഗ്രാന്‍ഡ് സ്ലാം കിരീടങ്ങള്‍ നേടിയ താരമെന്ന റെക്കോര്‍ഡില്‍ ജോക്കോ ഓസ്‌ട്രേലിയന്‍ വനിതാ താരം മാര്‍ഗരെറ്റ് കോര്‍ട്ടിനൊപ്പമെത്തി.

യുഎസ് ഓപ്പണിലെ പത്താം ഫൈനലില്‍ റഷ്യയുടെ ദാനില്‍ മെദ്വദേവിനെ 6-3,7-6,6-3 എന്ന സ്‌കോറിനാണു ജോക്കോ കീഴടക്കിയത്. 2021ലെ ഫൈനലില്‍ ഇരുവരും ഇവിടെ ഏറ്റുമുട്ടിയപ്പോള്‍ മെദ്വദേവിനായിരുന്നു ജയം. യുഎസ് ഓപ്പണ്‍ വിജയിക്കുന്ന പ്രായം കൂടിയ പുരുഷ താരമാണ് ജോക്കോവിച്ച്. സിംഗിള്‍സില്‍ ഏറ്റവും കൂടുതല്‍ ഗ്രാന്‍ഡ്സ്ലാം നേടിയ പുരുഷതാരമാണ് ജോക്കോവിച്ച്. 22 കിരീടം നേടിയ റാഫേല്‍ നഡാലാണ് തൊട്ടുപിന്നില്‍. റോജര്‍ ഫെഡററാണ് മൂന്നാം സ്ഥാനത്ത്.

റോജര്‍ ഫെഡറര്‍ കഴിഞ്ഞ വര്‍ഷമാണു ടെന്നിസില്‍നിന്നു വിരമിച്ചത്. അടുത്ത വര്‍ഷം കരിയര്‍ അവസാനിപ്പിക്കുമെന്നാണ് റാഫേല്‍ നദാലിന്റെ നിലപാട്. കരിയര്‍ ഇനിയും ബാക്കിയുള്ള ജോക്കോവിച്ച്, മാര്‍ഗരെറ്റ് കോര്‍ട്ടിനെയും മറികടന്ന് ഗ്രാന്‍ഡ് സ്ലാമുകളില്‍ മുന്നേറുമെന്ന് ഉറപ്പാണ്.

പെലെയുടെ റെക്കോര്‍ഡ് മറികടന്ന് നെയ്മര്‍