അടുത്തകാലത്തായി യുകെയില്‍ എത്തിയ മലയാളി കുടുംബങ്ങളിലേക്ക് മരണം തുടര്‍ച്ചയായി എത്തുന്ന സംഭവങ്ങളില്‍ ഏറ്റവും ഒടുവിലത്തേതായി യുകെയിൽ മലയാളി യുവാവ് കുഴഞ്ഞുവീണു മരിച്ചു. നാട്ടിൽ പെരുമ്പാവൂർ ഐരാപുരം സ്വദേശി ബാബു ജേക്കബ് ആണ് കെന്റിലെ ഡാര്‍ട്‌ഫോഡില്‍ വീട്ടിൽ കുഴഞ്ഞുവീണു മരിച്ചത്. രാവിലെ എഴുന്നേറ്റ ശേഷം അടുക്കളയിലേക്ക് എത്തിയ ബാബു അവിടെ കുഴഞ്ഞു വീഴുകയായിരുന്നു എന്നാണ് ഇപ്പോൾ പുറത്തുവരുന്ന വിവരം.
പെരുമ്പാവൂരിന് അടുത്ത ഐരാപുരം നിവാസിയാണ് ബാബു. ഐരാപുരം കുഴിച്ചാലില്‍ കുടുംബാംഗം ആണ്. കെയറര്‍ വിസയില്‍ നേഴ്സിങ് ഹോമില്‍ ജോലിക്കെത്തിയ ഭാര്യക്ക് ഒപ്പമാണ് ബാബുവും ഒരു വർഷം മുൻപ് യുകെയില്‍ എത്തിയത്. സമീപത്തെ ഹോസ്പിറ്റലില്‍ താത്കാലിക ജോലിയില്‍ പ്രവേശിച്ചിട്ട് അധിക കാലം ആയിരുന്നില്ല.
ഭാര്യ നൈറ്റ് ഡ്യൂട്ടിക്ക് ശേഷം വീട്ടിലെത്തുമ്പോള്‍ ബാബുവിനെ നിലത്തു കുഴഞ്ഞു വീണു കിടക്കുന്ന നിലയിൽ കണ്ടെത്തി എന്നാണു വിവരം. അതിവേഗം പാരാമെഡിക്‌സ് സേവനം തേടിയെങ്കിലും ജീവൻ രക്ഷിക്കാനായില്ല. 48 പിന്നിട്ട ആളെങ്കിലും തികച്ചും ആരോഗ്യവാനായിരുന്നു എന്നാണ് പ്രദേശ വാസികള്‍ പറയുന്നത്. മൃതദേഹം ഇപ്പോള്‍ സമീപത്തുള്ള ഹോസ്പിറ്റല്‍ മോര്‍ച്ചറിയിലേക്ക് മാറ്റിയിരിക്കുകയാണ്.
ബാബുവിന്റെ ആകസ്മിക വേർപാടിൽ കുടുംബാംഗങ്ങളുടെയും സുഹൃത്തുക്കളുടെയും ദുഃഖത്തിൽ ന്യൂസ് 4 മീഡിയയും പങ്കുചേരുന്നു.
Content Summary: A Malayali youth collapsed and died in the UK. Babu Jacob, a native of Airapuram, Perumbavoor, died after collapsing at his home in Dartford, Kent.
