കൊല്ലം: വിദേശത്ത് ജോലി വാഗ്ദാനം ചെയ്ത് പലരിൽ നിന്നായി ലക്ഷങ്ങൾ തട്ടിയെടുത്ത കേസിൽ ഒളിവിലായിരുന്ന ദമ്പതികൾ പിടിയിൽ. പത്തനാപുരം കലഞ്ഞൂർ സ്വദേശി വിനീഷ് ജസ്റ്റിനും ഭാര്യ ലിനുവുമാണ് അഞ്ചൽ പൊലീസിൻറെ പിടിയിലായത്. തട്ടിപ്പ് കേസിൽ അഞ്ചൽ സ്റ്റേഷനിൽ മാത്രം ഇവർക്കെതിരെ പരാതി നൽകിയിരിക്കുന്നത് 64 പേരാണ്.
അഞ്ചലിൽ ഏദൻസ് പാർക്ക് ഗ്ലോബൽ എന്ന സ്ഥാപനത്തിൻറെ മറവിലായിരുന്നു ദമ്പതികളുടെ തട്ടിപ്പ്. വിദേശത്തേക്ക് അയക്കാമെന്ന വാഗ്ദാനം നൽകി പലരിൽ നിന്നായി 50 ലക്ഷത്തിലധികം രൂപ കമ്മീഷനായി വാങ്ങുകയായിരുന്നു. സംഭവത്തിൽ ഏതാനും പേരെ വിദേശത്ത് അയക്കുകയും ചെയ്തിരുന്നു.
ഇത്തരത്തിൽ എത്തിച്ചവർക്കാകട്ടെ വാഗ്ദാനം നൽകിയ ജോലിയോ, ശമ്പളമോ, താമസ സൗകര്യമോ ലഭിച്ചില്ല. സംഭവത്തിൽ 2022ൽ അഞ്ചൽ പൊലീസ് കേസ് എടുത്തതോടെ വിനീഷും ലിനുവും ബിസിനസ് പങ്കാളി ടോണി സജിയും മുങ്ങുകയായിരുന്നു.
വിനീഷും ലിനുവും വിദേശത്തേക്കായിരുന്നു കടന്നത്. കുറച്ചു നാളുകൾക്ക് മുമ്പ് തിരിച്ചെത്തിയ ഇവർ എറണാകുളത്ത് വ്യാജ പേരിൽ താമസിച്ച് വരുകയായിരുന്നു. ഇതിനിടെയാണ് പിടിയിലാകുന്നത്.
