ഇൻസ്റ്റഗ്രാമിൽ ‘പൂക്കി സിഎം’ തരംഗം! തന്റെ എക്സ്പ്രഷൻ കണ്ട് മകൾ പ്രതികരിച്ചതിനെക്കുറിച്ച് വി.ഡി. സതീശൻ
തിരുവനന്തപുരം: സോഷ്യൽ മീഡിയയിൽ വൈറലായ ‘പൂക്കി മുഖ്യമന്ത്രി’ വീഡിയോയെക്കുറിച്ച് പ്രതികരിച്ച് മുഖ്യമന്ത്രി വി.ഡി. സതീശൻ. യുഡിഎഫ് സർക്കാരിന്റെ ആദ്യ മന്ത്രിസഭാ യോഗത്തിന് ശേഷമുള്ള വാർത്താസമ്മേളനത്തിനിടെ അദ്ദേഹം പ്രകടിപ്പിച്ച രസകരമായ മുഖഭാവമാണ് സോഷ്യൽ മീഡിയ ഏറ്റെടുത്തത്.
വാഹന മോഡിഫിക്കേഷൻ സംബന്ധിച്ച് ഒരു യുവാവ് ചോദിച്ച ചോദ്യത്തിന് മറുപടി പറയുന്നതിനിടെയായിരുന്നു വൈറലായ എക്സ്പ്രഷൻ. പിന്നാലെ ‘പൂക്കി മുഖ്യമന്ത്രി’ എന്ന പേരിൽ വീഡിയോ വ്യാപകമായി പ്രചരിച്ചു.
ഇപ്പോൾ സംഭവത്തെക്കുറിച്ച് വിശദീകരിച്ച് രംഗത്തെത്തിയിരിക്കുകയാണ് മുഖ്യമന്ത്രി. “ഒരു പയ്യനാണ് ആ ചോദ്യം ചോദിച്ചത്. വാത്സല്യത്തോടെ തന്ന മറുപടിയായിരുന്നു അത്. അവനോട് ഒരു അടുപ്പം തോന്നി. പേടിക്കണ്ടെടാ, ശരിയാക്കാമെന്ന മട്ടിലാണ് പറഞ്ഞത്. ചെറുപ്പക്കാരുടെ ആഗ്രഹമല്ലേ,” എന്നാണ് വി.ഡി. സതീശൻ പറഞ്ഞത്.
വൈറലായ വീഡിയോ മകളാണ് തന്നെ കാണിച്ചതെന്നും മുഖ്യമന്ത്രി പറഞ്ഞു. “എന്റെ മോളോട് പറയുന്നതുപോലെ തന്നെയായിരുന്നു ആ മറുപടി,” എന്നും അദ്ദേഹം കൂട്ടിച്ചേർത്തു.
മുഖ്യമന്ത്രിയുടെ ഈ പ്രതികരണത്തിന് പിന്നാലെ സമൂഹമാധ്യമങ്ങളിൽ കൂടുതൽ ട്രോളുകളും റീലുകളും പ്രചരിക്കുകയാണ്.
English Summary
Kerala Chief Minister V.D. Satheesan reacted to the viral “Pookie Chief Minister” video that gained popularity on social media after a press conference. Explaining the now-famous expression, Satheesan said he responded affectionately to a youngster’s question about vehicle modification, comparing it to how he would speak to his own daughter.
