കേരളത്തിൽ കാലവർഷം നേരിടാൻ വൻ സന്നാഹം; 8 ജില്ലകളിൽ എൻ.ഡി.ആർ.എഫ് സംഘങ്ങൾ നിലയുറപ്പിച്ചു!
തിരുവനന്തപുരം: കാലവർഷം എത്തുന്നതിന് മുന്നോടിയായി രക്ഷാപ്രവർത്തനങ്ങൾ ശക്തിപ്പെടുത്താൻ സംസ്ഥാനത്തെ എട്ട് ജില്ലകളിൽ ദേശീയ ദുരന്ത പ്രതികരണ സേനയുടെ പ്രത്യേക സംഘങ്ങളെ നിയോഗിച്ചു.
കൊല്ലം, പത്തനംതിട്ട, ആലപ്പുഴ, ഇടുക്കി, എറണാകുളം, തൃശ്ശൂർ, കോഴിക്കോട്, വയനാട് ജില്ലകളിലാണ് എൻ.ഡി.ആർ.എഫ് സംഘങ്ങളുടെ സേവനം ലഭ്യമാകുക. ഓരോ ജില്ലയിലും 30 അംഗങ്ങൾ വീതമുള്ള എട്ട് ടീമുകളാണ് വിന്യസിച്ചിരിക്കുന്നത്.
സംസ്ഥാന ദുരന്ത നിവാരണ അതോറിറ്റിയുടെ അഭ്യർത്ഥന പ്രകാരമാണ് തമിഴ്നാട്ടിലെ ദേശീയ ദുരന്ത പ്രതികരണ സേനയുടെ നാലാം ബറ്റാലിയനിൽ നിന്ന് 240 അംഗങ്ങളെ കേരളത്തിലേക്ക് നിയോഗിച്ചത്.
ഈ മാസം 26ഓടെ കാലവർഷം കേരളത്തിലെത്തുമെന്നാണ് കാലാവസ്ഥാ വകുപ്പിന്റെ പ്രവചനം. അടുത്ത അഞ്ച് ദിവസവും ഒറ്റപ്പെട്ട സ്ഥലങ്ങളിൽ ഇടിമിന്നലോടുകൂടിയ മഴയ്ക്കും ശക്തമായ കാറ്റിനും സാധ്യതയുണ്ടെന്നും മുന്നറിയിപ്പുണ്ട്.
ഇന്ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിൽ യെലോ അലർട്ട് പ്രഖ്യാപിച്ചിട്ടുണ്ട്. ശക്തമായ മഴയും കാറ്റും സാധ്യതയുള്ളതിനാൽ പൊതുജനങ്ങൾ ജാഗ്രത പാലിക്കണമെന്ന് അധികൃതർ നിർദേശിച്ചു.
English Summary
Ahead of the southwest monsoon, eight NDRF teams have been deployed across Kerala for rescue and emergency response operations. The teams have been stationed in vulnerable districts as the IMD forecasts heavy rain and strong winds in the coming days.
