കോഴിക്കോട്: നൈറ്റ് പട്രോളിങ്ങിനിടെ പൊലീസുകാരെ ആക്രമിച്ച രണ്ടു യുവാക്കൾ പിടിയിൽ. എലത്തൂർ സ്വദേശികളായ അബ്ദുൽ മുനീർ, അൻസാർ എന്നിവരെയാണ് നടക്കാവ് പൊലീസ് പിടികൂടിയത്.
സംഭവ സമയത്ത് ഇവർ ലഹരി ഉപയോഗിച്ചിരുന്നതായാണ് നിഗമനം. യുവാക്കൾ ലഹരിക്കടത്ത് സംഘത്തിൽ പെട്ടവരാണോയെന്ന കാര്യവും പൊലീസ് പരിശോധിച്ചുവരികയാണ്.
കോഴിക്കോട് അരയിടത്ത്പാലം-എരഞ്ഞിപ്പാലം റോഡിൽ നൈറ്റ് പട്രോളിങ്ങിനിറങ്ങിയ പൊലീസ് സംഘത്തിന് നേരെയാണ് രണ്ടംഗ സംഘത്തിൻ്റെ ആക്രമണമുണ്ടായത്.
ബിവറേജ് ഔട്ട്ലെറ്റിന് സമീപം സംശയാസ്പദമായ സാഹചര്യത്തിൽ രണ്ടുപേരെ കണ്ടതിനെത്തുടർന്ന് വാഹനം നിർത്തി പരിശോധന നടത്തുന്നതിനിടെ മൂന്ന് പൊലീസുകാർക്ക് നേരെയാണ് ആക്രമണമുണ്ടായത്.
ആക്രമണത്തിൽ നടക്കാവ് സ്റ്റേഷനിലെ നവീൻ, രതീഷ്, ഷിജിത്ത് തുടങ്ങിയ പൊലീസുകാർക്ക് പരിക്കേറ്റു. സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് പ്രതികളായ അബ്ദുൾ മുനീർ, അൻസാർ തുടങ്ങിയവരെ പിടികൂടിയത്. എലത്തൂർ വച്ചാണ് പ്രതികളെ പിടികൂടുന്നത് ഇവർ രക്ഷപ്പെടാൻ ഉപയോഗിച്ച കാറും പൊലീസ് കസ്റ്റഡിയിലെടുത്തു.
