വീട്ടിലെ പ്രധാന ശല്യക്കാരനാണ് പാറ്റ. ഇത് വരുത്തിവയ്ക്കുന്ന പ്രശ്നങ്ങൾ ചില്ലറയൊന്നുമല്ല. എന്നാൽ ഇത് വളരെ വ്യത്യസ്തമായ ഒരു പണിയാണ് ഈ പാറ്റ കാണിച്ചത്. ഒരു മനുഷ്യന്റെ ജീവൻ വരെ അപകടത്തിലാകുന്ന പണി. (The creature that got in through the nose became life threatening)
രാത്രി ഉറങ്ങിക്കിടന്നപ്പോൾ മൂക്കിലൂടെ കയറിയ പാറ്റ ശ്വസനനാളത്തിൽ കയറിപ്പോയാൽ എങ്ങനെയുണ്ടാകും? അതാണ് ഇവിടെ സംഭവിച്ചത്. ചൈനയിലെ ഹെനാൻ പ്രവിശ്യയിലെ താമസക്കാരനായ ഹൈക്കൗ എന്ന 58 -കാരൻറെ മൂക്കിലാണ് ഉറങ്ങിക്കിടന്നപ്പോൾ പാറ്റ കയറിയത്.
ഉറക്കത്തിനിടയിൽ എന്തോ കയറുന്നതുപോലെ തോന്നി ഹൈക്കൗ ഉണർന്നപ്പോൾ തൊണ്ടയ്ക്കുള്ളിലേക്ക് എന്തോ അരിച്ചിറങ്ങുന്നതുപോലെ അനുഭവപ്പെട്ടിരുന്നു. എന്നാൽ, കാര്യമായ അസ്വസ്ഥത ഒന്നുമില്ലാതിരുന്നതിനാൽ അയാൾ വീണ്ടും ഉറങ്ങി.
എന്നാൽ പിറ്റേന്ന് ഉണർന്നപ്പോൾ വായിൽ നിന്നും രൂക്ഷമായ ഒരു ഗന്ധം അയാൾക്ക് അനുഭവപ്പെട്ടു. എന്നാൽ അത് വലിയ കാര്യമാക്കാതെ നടന്നു.
പക്ഷെ ഓരോദിവസം ചെല്ലുന്തോറും ഹൈക്കൗവിന്റെ ആരോഗ്യം വഷളായിവന്നു. അതികഠിനമായ ചുമ അനുഭവപ്പെട്ടതോടെ മൂന്നു ദിവസങ്ങൾക്ക് ശേഷം ഇദ്ദേഹം ഡോക്ടറെ കാണാൻ തീരുമാനിച്ചു.
ആശുപത്രിയിൽ നടത്തിയ സിടി സ്കാനിങ്ങിൽ ശ്വസനനാളത്തിൽ കുടുങ്ങിയ നിലയിൽ പാറ്റയെ കണ്ടെത്തി. തുടർന്ന് ഒരു മണിക്കൂര്‍ നീണ്ട മെഡിക്കൽ നടപടിക്രമങ്ങൾക്ക് ശേഷം അഴുകിയ അവസ്ഥയിലിരുന്ന പാറ്റയെ പുറത്തെടുത്തു.
ഹൈക്കൗവിൻ്റെ ആരോഗ്യനില തൃപ്തികരമാണെന്ന് ഡോക്ടർമാർ അറിയിച്ചു. ഒരു ചെറിയ അശ്രദ്ധ ജീവനുതന്നെ ഭീഷണിയാകുന്ന സാഹചര്യത്തിൽ നിന്നും കഷ്ടിച്ച് രക്ഷപ്പെട്ടതിന്റെ ആശ്വാസത്തിലാണ് ഹൈക്കൗ.
