രാജധാനി എക്സ്പ്രസിൽ വൻ തീപിടിത്തം! കോച്ചും എൻജിനും കത്തിയമർന്നു; മലയാളി യാത്രക്കാർ ഉൾപ്പെടെയുള്ളവർ അത്ഭുതകരമായി രക്ഷപ്പെട്ടു
ദില്ലി: തിരുവനന്തപുരം-ദില്ലി രാജധാനി എക്സ്പ്രസിൽ രാജസ്ഥാനിലെ കോട്ടയ്ക്ക് സമീപം തീപിടിത്തമുണ്ടായി. ബി-1 എസി കോച്ചിലും എൻജിൻ കംപാർട്ട്മെന്റിലുമാണ് തീ പടർന്നത്. ഇന്ന് പുലർച്ചെ അഞ്ചരയോടെയായിരുന്നു സംഭവം.
തീപിടിത്തം ശ്രദ്ധയിൽപ്പെട്ടതോടെ ട്രെയിനിലുണ്ടായിരുന്ന യാത്രക്കാരെ ഉടൻ സുരക്ഷിതമായി ഒഴിപ്പിച്ചു. ആളപായമൊന്നും റിപ്പോർട്ട് ചെയ്തിട്ടില്ലെന്നാണ് പ്രാഥമിക വിവരം. തീ കൂടുതൽ പടരാതിരിക്കാനായി ബോഗിയും എൻജിനും വേർപെടുത്തി.
രണ്ട് ഫയർ എഞ്ചിനുകൾ സ്ഥലത്തെത്തി തീയണച്ചു. തീപിടിത്തത്തെ തുടർന്ന് ബി-1 കോച്ചും എൻജിൻ ഭാഗവും പൂർണമായി കത്തിനശിച്ചതായാണ് വിവരം.
വെള്ളിയാഴ്ച തിരുവനന്തപുരത്ത് നിന്ന് പുറപ്പെട്ട ട്രെയിൻ ഇന്ന് ഉച്ചയോടെ ദില്ലിയിലെത്തേണ്ടതായിരുന്നു. ട്രെയിനിൽ നിരവധി മലയാളി യാത്രക്കാരുമുണ്ടായിരുന്നു.
സംഭവത്തിൽ റെയിൽവേ അന്വേഷണം ആരംഭിച്ചു. തീപിടിത്തത്തിന്റെ കാരണം വ്യക്തമല്ലെന്നും വിശദമായ പരിശോധനയ്ക്ക് ശേഷമേ കൂടുതൽ വിവരങ്ങൾ ലഭ്യമാകൂവെന്നും അധികൃതർ അറിയിച്ചു.
English Summary
A fire broke out on the Thiruvananthapuram-Delhi Rajdhani Express near Kota in Rajasthan early Sunday morning. The blaze affected the B1 AC coach and the engine compartment. All passengers were safely evacuated, and no casualties have been reported so far. Fire engines rushed to the spot and controlled the fire after separating the affected coach and engine. Railway authorities have launched an investigation into the incident.
