ലക്ഷങ്ങൾ വാരിക്കൂട്ടി ശിവരാജു! രാമചന്ദ്രനും പാമ്പാടി രാജനുമൊപ്പം തിളങ്ങുന്ന തൃക്കടവൂർ ശിവരാജു; ഇത്തവണത്തെ വരുമാനം ഇങ്ങനെ
കൊല്ലം: ഉത്സവപ്പറമ്പുകളിലെ ആവേശമായ ഗജരാജൻ ശിവരാജു വീണ്ടും ശ്രദ്ധാകേന്ദ്രമാകുന്നു. തൃശൂർ പൂരത്തിൽ പാറമേക്കാവ് ഭഗവതിയുടെ തിടമ്പേറ്റിയ ‘തെക്കിന്റെ തേവർ’ എന്നറിയപ്പെടുന്ന ശിവരാജു, തിരുവിതാംകൂർ ദേവസ്വം ബോർഡിന്റെ പ്രധാന വരുമാനസ്രോതസുകളിലൊന്നായി മാറിയിരിക്കുകയാണ്.
ഈ ഉത്സവ സീസണിൽ വെറും രണ്ടരമാസത്തിനിടെ 58.56 ലക്ഷം രൂപയാണ് ശിവരാജു ദേവസ്വം ബോർഡിന് നേടിക്കൊടുത്തത്. സീസൺ അവസാനിക്കുമ്പോഴേക്കും വരുമാനം 70 ലക്ഷം കടക്കുമെന്നാണ് കണക്ക്.
കൊല്ലം തൃക്കടവൂർ മഹാദേവ ക്ഷേത്രത്തിലെ ആനയായ ശിവരാജുവിനെ ആനപ്രേമികൾ തെച്ചിക്കോട്ടുകാവ് രാമചന്ദ്രൻ, പാമ്പാടി രാജൻ, ചിറയ്ക്കൽ കാളിദാസൻ എന്നിവരോടൊപ്പമാണ് പരിഗണിക്കുന്നത്. കഴിഞ്ഞ വർഷങ്ങളിലായി 80 ലക്ഷത്തിലധികം രൂപയുടെ വരുമാനം ശിവരാജു നേടിക്കൊടുത്തിട്ടുണ്ട്.
ഇത്തവണ ആരോഗ്യപരമായ കാരണങ്ങളാൽ 25 ഉത്സവങ്ങളിൽ മാത്രമാണ് പങ്കെടുത്തത്. കാലിന് നേരിയ നീരുള്ളതിനാൽ കൊല്ലം, തിരുവനന്തപുരം, ആലപ്പുഴ ജില്ലകളിലേക്കാണ് എഴുന്നള്ളിപ്പ് പരിമിതപ്പെടുത്തിയത്. എന്നാൽ പാറമേക്കാവ് ദേവസ്വത്തിന്റെ നിർബന്ധത്തെ തുടർന്ന് തൃശൂർ പൂരത്തിൽ പങ്കെടുപ്പിക്കുകയായിരുന്നു.
54 വയസ്സുള്ള ശിവരാജുവിനെ 1973-ൽ കോന്നിയിലെ കിടങ്ങിൽ നിന്ന് ഭക്തർ വാങ്ങി ക്ഷേത്രത്തിലേക്ക് കൊണ്ടുവന്നതാണ്. സ്വകാര്യ ക്ഷേത്രങ്ങളിൽ എഴുന്നള്ളിപ്പിന് 2.5 ലക്ഷം രൂപയാണ് അടിസ്ഥാന ഏക്കത്തുക. ഒന്നിലധികം ബുക്കിംഗ് വന്നാൽ ലേലത്തിലൂടെയാണ് തീരുമാനമെടുക്കുന്നത്. ദേവസ്വം ക്ഷേത്രങ്ങൾക്ക് 75,000 രൂപയാണ് നിരക്ക്.
തിരുവിതാംകൂർ ദേവസ്വം ബോർഡിന് നിലവിൽ 21 ആനകളുണ്ട്. ഒരു ലക്ഷം രൂപ ഏക്കത്തുകയോടെ ആറ്റിങ്ങൽ തിരുവാറാട്ടുകാവ് കാളിദാസാണ് വരുമാനത്തിൽ രണ്ടാമത്.
മാതംഗലീലയിൽ പറയുന്ന ഉത്തമ ഗജത്തിന്റെ എല്ലാ ലക്ഷണങ്ങളും ശിവരാജുവിനുണ്ടെന്നാണ് ആനപ്രേമികളുടെ വിലയിരുത്തൽ. നിലത്തിഴയുന്ന തുമ്പിക്കൈ, കടഞ്ഞെടുത്ത കൊമ്പുകൾ, തേൻനിറ കണ്ണുകൾ, ഉയർന്ന മസ്തകം, പതിനെട്ട് നഖങ്ങൾ എന്നിവയാണ് പ്രത്യേകതകൾ.
English Summary
Gajarajan Shivaraju, one of Kerala’s most celebrated temple elephants, has earned over ₹58 lakh for the Travancore Devaswom Board in just two-and-a-half months this festival season.
gajarajan-shivaraju-travancore-devaswom-income
Gajarajan Shivaraju, Temple Elephant Kerala, Travancore Devaswom Board, Thrissur Pooram, Kerala Festivals, Paramekkavu Bhagavathy, Elephant Festival, Kerala Culture, Kollam News, Temple Traditions
