ഭീതിയുടെ നിമിഷങ്ങൾ! ബൈക്കിലെത്തിയ യുവാക്കളുടെ ആക്രമണശ്രമം; നടി നിമിഷ നായരുടെ വെളിപ്പെടുത്തൽ
മുംബൈ: Nimisha Nair നേരിട്ട ഭീതിജനക അനുഭവം സമൂഹമാധ്യമങ്ങളിൽ വലിയ ചര്ച്ചയാകുന്നു. ഊബർ ടാക്സിയിൽ യാത്ര ചെയ്യുന്നതിനിടെ ബൈക്കിലെത്തിയ രണ്ട് യുവാക്കൾ പിന്തുടർന്ന് കാറ് തടഞ്ഞ് ഭീഷണിപ്പെടുത്തിയതായി താരം വെളിപ്പെടുത്തി.
ഇൻസ്റ്റഗ്രാമിൽ പങ്കുവെച്ച കുറിപ്പിലും ദൃശ്യങ്ങളിലും സംഭവം വ്യക്തമായി കാണാം. മുംബൈ പൊലീസിനെ ടാഗ് ചെയ്തുകൊണ്ടാണ് താരം പോസ്റ്റ് പങ്കുവെച്ചത്.
ചൊവ്വാഴ്ച പുലർച്ചെ ബാന്ദ്രയിൽ വച്ചാണ് സംഭവം ഉണ്ടായത്. കാർ സ്കൂട്ടറിനെ മറികടന്നതാകാം പ്രകോപനത്തിന് കാരണമെന്നാണ് നിമിഷയുടെ വിലയിരുത്തൽ. തുടർന്ന് ബൈക്കിലെത്തിയവർ കാറിനെ പിന്തുടർന്ന് ഹൈവേയിൽ നടുവിൽ തടഞ്ഞു.
ഖേർവാഡി ഫ്ളൈഓവറിന് സമീപം വെസ്റ്റേൺ എക്സ്പ്രസ് ഹൈവേയിൽ വാഹനം കുറുകെ നിർത്തി ഡ്രൈവറെ ഭീഷണിപ്പെടുത്തിയതായാണ് നിമിഷ പറയുന്നത്. വാതിൽ ബലമായി തുറക്കാൻ ശ്രമിക്കുകയും, വിൻഡോ ഗ്ലാസ് താഴ്ത്താൻ ആവശ്യപ്പെടുകയും ചെയ്തു. മോശം ഭാഷയിൽ ചീത്തവിളിക്കുകയും ആക്രമണ ഭീഷണി മുഴക്കുകയും ചെയ്തതായി താരം വ്യക്തമാക്കി.
“ഡ്രൈവറെ അടിക്കാനാണ് അവർ ശ്രമിച്ചതെന്ന് വ്യക്തമായിരുന്നു. സുരക്ഷയെ പരിഗണിച്ച് ഞങ്ങൾ വിൻഡോ തുറക്കാൻ തയ്യാറായില്ല,” എന്ന് നിമിഷ പറഞ്ഞു.
ഹൈവേയിൽ നിരവധി വാഹനങ്ങൾ ഉണ്ടായിരുന്നിട്ടും ആരും ഇടപെട്ടില്ലെന്നും താരം ചൂണ്ടിക്കാട്ടി. വീഡിയോ ചിത്രീകരണം തുടങ്ങിയത് ശ്രദ്ധയിൽപ്പെട്ടതോടെയാണ് ആക്രമികൾ പിന്മാറിയത്. പോകും മുമ്പ് കാറിന്റെ ചിത്രം പകർത്തിയതായും നിമിഷ വ്യക്തമാക്കി.
സംഭവം നഗരത്തിലെ സ്ത്രീസുരക്ഷയെ കുറിച്ചുള്ള ആശങ്കകൾ വീണ്ടും ഉയർത്തിയിരിക്കുകയാണ്. ഡൽഹിയിൽ ജനിച്ചുവളർന്ന നിമിഷ, പുണെ ഫിലിം ഇൻസ്റ്റിറ്റ്യൂട്ടിൽ പഠിച്ചതിന് ശേഷം മുംബൈയിൽ സ്ഥിരതാമസമാണ്.
English Summary
Actress Nimisha Nair shared a terrifying experience from Mumbai, where two men on a bike chased and threatened her Uber car on a highway. The attackers allegedly tried to open the car door and verbally abused the driver. The incident, which occurred early morning near Bandra, ended only after she started recording the video. The actress raised concerns over women’s safety in the city.
