സംസ്ഥാന മൃഗത്തിനും പക്ഷിക്കും പുറമെ സംസ്ഥാന സൂക്ഷ്മാണുവും; മുഖ്യമന്ത്രി പിണറായി വിജയൻ ഔദ്യോഗിക പ്രഖ്യാപനം നടത്തും
തിരുവനന്തപുരം: സംസ്ഥാന മൃഗത്തിനും പക്ഷിക്കും പുറമെ സ്വന്തമായി ഒരു സംസ്ഥാന സൂക്ഷ്മാണുവിനെ (മൈക്രോബ്) പ്രഖ്യാപിക്കുന്ന രാജ്യത്തെ ആദ്യ സംസ്ഥാനമായി കേരളം മാറുന്നു.
ഈ മാസം 23ന് തിരുവനന്തപുരം കഴക്കൂട്ടം കിൻഫ്രയിലെ സെന്റർ ഫോർ എക്സലൻസ് ഇൻ മൈക്രോബയോം കേന്ദ്രത്തിൽ നടക്കുന്ന ചടങ്ങിൽ മുഖ്യമന്ത്രി പിണറായി വിജയൻ ഔദ്യോഗിക പ്രഖ്യാപനം നടത്തും.
സാധാരണയായി രോഗകാരികളെന്ന ധാരണയിൽ മാത്രം സൂക്ഷ്മാണുക്കളെ കാണുന്ന പൊതുസമൂഹത്തിന് മുന്നിൽ, അവയുടെ ഗുണകരമായ വശങ്ങൾ അവതരിപ്പിക്കുക എന്ന ലക്ഷ്യത്തോടെയാണ് ഈ നീക്കം.
ദഹനസഹായം, രോഗപ്രതിരോധശേഷി വർധന, മണ്ണിന്റെ ആരോഗ്യം, മെച്ചപ്പെട്ട വിളവെടുപ്പ്, പരിസ്ഥിതി സന്തുലനം എന്നിവയിൽ സൂക്ഷ്മാണുക്കൾ നിർണായക പങ്ക് വഹിക്കുന്നുവെന്ന ബോധവൽക്കരണമാണ് പദ്ധതിയുടെ പ്രധാന ലക്ഷ്യം.
സംസ്ഥാന സൂക്ഷ്മാണു എന്ന ആശയം മുന്നോട്ടുവച്ചത് സെന്റർ ഫോർ എക്സലൻസ് ഇൻ മൈക്രോബയോമിന്റെ ഡയറക്ടറായ ഡോ. സാബു തോമസാണ്.
മൈക്രോബയോം മേഖലയിൽ ഗവേഷണങ്ങൾ പ്രോത്സാഹിപ്പിക്കുകയും പൊതുജനങ്ങളിൽ ശാസ്ത്രാവബോധം വർധിപ്പിക്കുകയും ചെയ്യുകയാണ് സർക്കാരിന്റെ ലക്ഷ്യം.
കൃഷി, ആരോഗ്യം, പരിസ്ഥിതി സംരക്ഷണം തുടങ്ങിയ മേഖലകളിൽ സൂക്ഷ്മാണുക്കളുടെ പ്രാധാന്യം ജനങ്ങളിലേക്ക് എത്തിക്കുക, ലൈഫ് സയൻസ് മേഖലയിലേക്ക് കൂടുതൽ യുവാക്കളെ ആകർഷിക്കുക, രാസവസ്തുക്കളുടെ ഉപയോഗം കുറച്ച് പ്രകൃതിസൗഹൃദ മാർഗങ്ങൾ സ്വീകരിക്കുക എന്നിവയും പദ്ധതിയുടെ ഭാഗമാണ്.
2013ൽ ഇന്ത്യ ‘ലാക്ടോബാസില്ലസ് ഡെൽബ്രൂക്കി’ എന്ന ബാക്ടീരിയയെ ദേശീയ സൂക്ഷ്മാണുവായി പ്രഖ്യാപിച്ചിരുന്നു. പുളിപ്പിക്കൽ പ്രക്രിയയിലൂടെ ദഹനസഹായവും പ്രതിരോധശക്തി വർധനയും നൽകുന്ന പ്രോബയോട്ടിക് ഗുണങ്ങളുള്ള ഈ ബാക്ടീരിയയെ മാതൃകയാക്കിയാണു കേരളം സംസ്ഥാനതലത്തിൽ ഈ ചരിത്രനടപടി സ്വീകരിക്കുന്നത്.
സംസ്ഥാന സൂക്ഷ്മാണു പ്രഖ്യാപന ചടങ്ങിനൊപ്പം, കിൻഫ്രയിൽ ആരംഭിച്ച സെന്റർ ഫോർ എക്സലൻസ് ഇൻ മൈക്രോബയോമിന്റെ സമർപ്പണവും ‘Research and Industrial Landscape of Microbiome’ എന്ന വിഷയത്തിലുള്ള കോൺക്ലേവിന്റെ ഉദ്ഘാടനവും മുഖ്യമന്ത്രി നിർവഹിക്കും.
English Summary
Kerala is set to become the first state in India to declare an official state microbe, in addition to its state animal and bird.
kerala-to-declare-first-state-microbe-in-india
Kerala News, State Microbe, Microbiome Research, Science Awareness, KINFRA, Pinarayi Vijayan, Life Science
