ടെൻഡറുമില്ല, ബില്ലുമില്ല! ലക്ഷങ്ങളുടെ പൂജാസാമഗ്രികൾ എത്തിയത് എങ്ങനെ? ശബരിമലയിൽ ‘സുനിൽ സ്വാമി’ക്ക് 10 വർഷത്തെ ആധിപത്യം? അഷ്ടാഭിഷേക സാമഗ്രികളുടെ വിതരണത്തിൽ സുതാര്യതയില്ലെന്ന് ഹൈക്കോടതി ദേവസ്വം ബെഞ്ച്
കൊച്ചി: ശബരിമലയിലെ അഷ്ടാഭിഷേക പൂജയ്ക്കും നിത്യപൂജകൾക്കും ആവശ്യമായ സാമഗ്രികൾ വിതരണം ചെയ്യുന്നതിൽ ക്രമക്കേട് നടന്നിട്ടുണ്ടോയെന്ന് ഹൈക്കോടതി സംശയം പ്രകടിപ്പിച്ചു. കൊല്ലം സ്വദേശി സുനിൽകുമാർ എന്ന സുനിൽ സ്വാമിക്ക് വർഷങ്ങളായി ഈ ചുമതല നൽകിയ സാഹചര്യത്തിലാണ് കോടതി വിശദീകരണം തേടിയത്.
ജസ്റ്റിസ് വി. രാജ വിജയരാഘവൻ, ജസ്റ്റിസ് കെ.വി. ജയകുമാർ എന്നിവരടങ്ങിയ ദേവസ്വം ബെഞ്ച് തിരുവിതാംകൂർ ദേവസ്വം ബോർഡിനോട് റിപ്പോർട്ട് സമർപ്പിക്കാൻ നിർദേശിച്ചു. ദേവസ്വം വിജിലൻസിന്റെ പ്രാഥമിക അന്വേഷണ റിപ്പോർട്ടും സ്പെഷ്യൽ കമ്മിഷണറുടെ കണ്ടെത്തലുകളും പരിഗണിച്ചാണ് നടപടി.
പൂജയ്ക്കാവശ്യമായ അരി, മലർ, ശർക്കര, നാളികേരം, പട്ട്, തോർത്ത് തുടങ്ങി നിരവധി സാധനങ്ങൾ വർഷങ്ങളായി സുനിൽ സ്വാമിയാണ് എത്തിക്കുന്നതെന്ന് റിപ്പോർട്ടിൽ പറയുന്നു. മാസപൂജയ്ക്കും മണ്ഡലകാലത്തുമായി ലക്ഷക്കണക്കിന് രൂപയുടെ സാമഗ്രികൾ വിതരണം ചെയ്തിട്ടുണ്ടെങ്കിലും ബില്ലുകളോ വൗച്ചറുകളോ രേഖപ്പെടുത്തിയിട്ടില്ലെന്നും ടെൻഡർ നടപടികൾ പാലിച്ചിട്ടില്ലെന്നും വിജിലൻസ് കണ്ടെത്തി.
സാധനങ്ങൾ സംഭാവനയായി ലഭിച്ചിട്ടും ദേവസ്വം ഫണ്ടിൽ നിന്ന് വാങ്ങിയതായി കാട്ടി പണം മാറ്റിയെന്ന ആരോപണവും ഉയർന്നിട്ടുണ്ട്. കഴിഞ്ഞ പത്ത് വർഷമായി കൃത്യമായ ഓഡിറ്റിംഗ് നടന്നിട്ടില്ലെന്നും റിപ്പോർട്ടിൽ ചൂണ്ടിക്കാട്ടുന്നു.
അഷ്ടാഭിഷേക പൂജാസാമഗ്രികളുടെ വാങ്ങലിൽ സുതാര്യത ഉറപ്പാക്കാൻ പുതിയ മാർഗനിർദേശങ്ങൾ സമർപ്പിക്കണമെന്ന് ഹൈക്കോടതി നിർദേശിച്ചു. കഴിഞ്ഞ പത്ത് വർഷത്തെ കണക്കുകൾ ഓഡിറ്റ് ചെയ്ത് റിപ്പോർട്ട് നൽകാൻ സ്റ്റേറ്റ് ഓഡിറ്റ് ഡിപ്പാർട്ട്മെന്റിനും കോടതി നിർദേശം നൽകി. കേസ് അടുത്ത ആഴ്ച വീണ്ടും പരിഗണിക്കും.
English Summary
The Kerala High Court raised suspicion over alleged irregularities in the procurement of pooja materials for Sabarimala rituals, involving Kollam native Sunil Kumar, known as Sunil Swami. The court sought explanations from the Travancore Devaswom Board after vigilance reports pointed to lack of bills, tenders, and proper auditing for several years. An audit of the past ten years’ accounts has also been ordered.
