ലോകകപ്പ് ആരാധകർക്ക് ‘സൗജന്യ കോണ്ടം’! ടൊറന്റോ നഗരത്തിൽ വമ്പൻ സുരക്ഷാ പ്രഖ്യാപനം; പിന്നിലെ കാരണം ഇതാണ്
ടൊറന്റോ: ഫിഫ ലോകകപ്പ് ആവേശം ലോകമെമ്പാടും ഉയരുന്നതിനിടെ കാനഡയിലെ ടൊറന്റോ പബ്ലിക് ഹെൽത്ത് വകുപ്പിന്റെ വ്യത്യസ്ത പ്രഖ്യാപനം ശ്രദ്ധ നേടുന്നു. ലോകകപ്പ് മത്സരങ്ങൾ കാണാനെത്തുന്ന ആരാധകർക്ക് സൗജന്യമായി കോണ്ടം വിതരണം ചെയ്യാനാണ് അധികൃതരുടെ തീരുമാനം.
ഫിഫ ലോകകപ്പിനെ ആസ്പദമാക്കി പ്രത്യേക ഡിസൈനിൽ തയ്യാറാക്കിയ കോണ്ടം പാക്കറ്റുകളാണ് വിതരണം ചെയ്യുക. ടൊറന്റോയിലെ സെക്ഷ്വൽ ഹെൽത്ത് ക്ലിനിക്കുകൾ വഴിയായിരിക്കും ഇവ ലഭ്യമാക്കുക. ലോകകപ്പിനോടനുബന്ധിച്ച് വലിയ തോതിൽ ആളുകൾ എത്തുന്ന സാഹചര്യത്തിൽ പൊതുജനാരോഗ്യവും സുരക്ഷയും ഉറപ്പാക്കുകയാണ് പദ്ധതിയുടെ ലക്ഷ്യമെന്ന് ആരോഗ്യവകുപ്പ് വ്യക്തമാക്കി.
ഇത്തവണത്തെ ഫിഫ ലോകകപ്പ് യുഎസ്, മെക്സിക്കോ, കാനഡ എന്നീ രാജ്യങ്ങളിലായാണ് നടക്കുന്നത്. ചരിത്രത്തിലാദ്യമായി 48 ടീമുകൾ പങ്കെടുക്കുന്ന ടൂർണമെന്റിൽ 104 മത്സരങ്ങളാണ് ഉൾപ്പെടുത്തിയിരിക്കുന്നത്. ഏകദേശം 6.5 ദശലക്ഷം ആരാധകർ നേരിട്ട് മത്സരങ്ങൾ കാണാനെത്തുമെന്നാണ് പ്രതീക്ഷ.
കാനഡയിൽ ടൊറന്റോയും വാൻകൂവറും ഉൾപ്പെടെ 13 മത്സരങ്ങൾക്ക് വേദിയാകും. ലോകകപ്പിനോടനുബന്ധിച്ചുള്ള ആഘോഷങ്ങൾ ഇതിനകം നഗരങ്ങളിൽ സജീവമായി തുടങ്ങിയിട്ടുണ്ട്.
അതേസമയം ലോകകപ്പിന്റെ ഔദ്യോഗിക ഗാനവും സോഷ്യൽ മീഡിയയിൽ വൈറലായിരിക്കുകയാണ്. കൊളംബിയൻ ഗായിക Shakira പുറത്തിറക്കിയ ‘ഡായ് ഡായ്’ എന്ന ഗാനത്തിന്റെ വീഡിയോ ആരാധകർ ഏറ്റെടുത്തിരിക്കുകയാണ്. 2010 ദക്ഷിണാഫ്രിക്ക ലോകകപ്പിലെ ‘വക്കാ വക്കാ’ ഗാനത്തിലൂടെ തന്നെ ലോകകപ്പ് ആരാധകരുടെ പ്രിയങ്കരിയായ താരമാണ് ഷക്കീറ.
English Summary
Toronto Public Health has announced a special campaign to distribute free condoms to football fans arriving for the FIFA World Cup.
