ബെയ്റൂട്ട്: പശ്ചിമേഷ്യയെ പിടിച്ചുകുലുക്കി ലെബനനിൽ ഇസ്രായേലിന്റെ സംഹാരതാണ്ഡവം.
നിമിഷങ്ങൾക്കുള്ളിൽ നൂറോളം കേന്ദ്രങ്ങളിൽ ഇസ്രായേൽ നടത്തിയ അതിശക്തമായ വ്യോമാക്രമണത്തിൽ കൊല്ലപ്പെട്ടവരുടെ എണ്ണം 250 കടന്നതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു.
ആയിരക്കണക്കിന് ആളുകൾക്ക് പരിക്കേൽക്കുകയും ജനവാസ മേഖലകൾ അപ്പാടെ തകരുകയും ചെയ്തതോടെ മേഖല അതീവ ഗുരുതരാവസ്ഥയിലാണ്.
വെറും പത്ത് മിനിറ്റിൽ നൂറ് കേന്ദ്രങ്ങൾ തകർത്തു; യുദ്ധം തുടങ്ങിയ ശേഷമുള്ള ഏറ്റവും ഭീകരമായ വ്യോമാക്രമണം
യുദ്ധം ആരംഭിച്ചതിനുശേഷം ലെബനൻ സാക്ഷ്യം വഹിക്കുന്ന ഏറ്റവും മാരകമായ ആക്രമണത്തിനാണ് കഴിഞ്ഞ മണിക്കൂറുകൾ സാക്ഷ്യം വഹിച്ചത്.
കൃത്യമായ ഇടവേളകളില്ലാതെ, വെറും പത്ത് മിനിറ്റിനുള്ളിലാണ് നൂറോളം സൈനിക-സിവിൽ കേന്ദ്രങ്ങളിൽ ഇസ്രായേൽ ബോംബുകൾ വർഷിച്ചത്.
ബെയ്റൂട്ട്, തെക്കൻ ലെബനൻ, കിഴക്കൻ ബെഖാ മേഖല എന്നിവിടങ്ങളിലെ ജനവാസ കേന്ദ്രങ്ങൾ ഈ മിന്നലാക്രമണത്തിൽ അക്ഷരാർത്ഥത്തിൽ തകർന്നുപോയി.
യാതൊരുവിധ മുന്നറിയിപ്പുകളുമില്ലാതെയായിരുന്നു ജനക്കൂട്ടത്തിന് നേരെ ഈ ആക്രമണമെന്നാണ് ലഭിക്കുന്ന വിവരം.
ചിതറിത്തെറിച്ച ബഹുനില മന്ദിരങ്ങളും പുകപടലത്തിൽ മുങ്ങിയ തെരുവുകളും; ലെബനനിൽ കണ്ടത് സമാനതകളില്ലാത്ത നാശനഷ്ടം
ആക്രമണത്തിന്റെ തീവ്രത വെളിപ്പെടുത്തുന്ന ദൃശ്യങ്ങളാണ് പുറത്തുവരുന്നത്.
ടയർ നഗരത്തിലെ ഒരു ബഹുനില കെട്ടിടം സ്ഫോടനത്തിൽ നിലംപൊത്തുന്നതും നിമിഷങ്ങൾക്കുള്ളിൽ ആ പ്രദേശം മുഴുവൻ കറുത്ത പുകയാൽ മൂടപ്പെടുന്നതും ലോകത്തെ ഞെട്ടിച്ചു.
തിരക്കേറിയ തെരുവുകളെ ലക്ഷ്യം വെച്ചായിരുന്നു ആക്രമണമെന്നത് നാശനഷ്ടങ്ങളുടെ ആക്കം കൂട്ടി. നിരവധി കുടുംബങ്ങൾ കെട്ടിടങ്ങൾക്കിടയിൽ കുടുങ്ങിക്കിടക്കുന്നതായാണ് റിപ്പോർട്ടുകൾ.
ആശുപത്രികൾ പരിക്കേറ്റവരെക്കൊണ്ട് നിറയുന്നു; അടിയന്തര രക്തദാനത്തിന് ആഹ്വാനം നൽകി ലെബനൻ ആരോഗ്യ മന്ത്രാലയം
ആക്രമണത്തിൽ 700-ലധികം പേർക്ക് ഗുരുതരമായി പരിക്കേറ്റിട്ടുണ്ട്. ലെബനനിലെ പ്രധാന ആശുപത്രികളെല്ലാം പരിക്കേറ്റവരെക്കൊണ്ട് നിറഞ്ഞു കവിഞ്ഞ അവസ്ഥയിലാണ്.
ഇറാനിലെ ഇന്ത്യൻ പൗരന്മാർക്ക് അടിയന്തര മുന്നറിയിപ്പ്: എത്രയും പെട്ടെന്ന് രാജ്യം വിടാൻ നിർദേശം
അടിയന്തര ശസ്ത്രക്രിയകൾക്കായി വലിയ തോതിൽ രക്തം ആവശ്യമുണ്ടെന്നും, ജനങ്ങൾ മുന്നോട്ടുവരണമെന്നും ലെബനൻ ആരോഗ്യ മന്ത്രാലയം അഭ്യർത്ഥിച്ചു.
മരണസംഖ്യം ഇനിയും കുത്തനെ ഉയരാൻ സാധ്യതയുണ്ടെന്നാണ് ആരോഗ്യപ്രവർത്തകർ നൽകുന്ന സൂചന.
ഇസ്രായേലിന്റേത് കാടത്തമെന്ന് പ്രസിഡന്റ്; വെടിനിർത്തൽ ലെബനന് ബാധകമല്ലെന്ന് പ്രഖ്യാപിച്ച് ബെഞ്ചമിൻ നെതന്യാഹു
ഇസ്രായേൽ നടത്തുന്ന ഈ ആക്രമണങ്ങളെ ‘കാടത്തം’ എന്നാണ് ലെബനൻ പ്രസിഡന്റ് ജോസഫ് ഔൺ വിശേഷിപ്പിച്ചത്.
എന്നാൽ, ഇറാനുമായി വെടിനിർത്തൽ ചർച്ചകൾ നടക്കുന്നുണ്ടെങ്കിലും ലെബനനെ അതിൽ ഉൾപ്പെടുത്തില്ലെന്ന് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു തീർത്തുപറഞ്ഞു.
ഇസ്രായേലിന്റെ ആക്രമണത്തിന് തിരിച്ചടിയായി ഹിസ്ബുള്ള വടക്കൻ ഇസ്രായേലിലേക്ക് റോക്കറ്റ്-മിസൈൽ വർഷം തുടരുകയാണ്
English Summary
Israel launched its most intense bombing campaign on Lebanon since the current conflict began, killing over 250 people and injuring hundreds. Within a mere 10-minute window, approximately 100 locations were struck across Beirut, Southern Lebanon, and the Bekaa Valley. Lebanon’s President Joseph Aoun condemned the acts as “barbaric,” while hospitals face a massive crisis, pleading for urgent blood donations. Despite talks of a ceasefire with Iran, Israeli PM Benjamin Netanyahu stated it would not extend to Lebanon. Meanwhile, Hezbollah has retaliated with rocket attacks on Northern Israel.
