കാട്ടാക്കടയെ നടുക്കി നവജാത ശിശുവിന്റെ കൊലപാതകം; കുഞ്ഞിനെ കൊന്നത് മാതാവ് തന്നെയെന്ന് പോലീസ്, 21-കാരി അറസ്റ്റിൽ
തിരുവനന്തപുരം: കാട്ടാക്കട പുഴനാട്ടിൽ നവജാത ശിശുവിനെ കൊലപ്പെടുത്തിയ സംഭവത്തിൽ മാതാവായ ഷംന (21)യെ പൊലീസ് അറസ്റ്റ് ചെയ്തു. ഞായറാഴ്ച വീട്ടിൽ പ്രസവിച്ച കുഞ്ഞിനെ തുടർന്ന് കൊലപ്പെടുത്തിയതായാണ് പൊലീസ് അന്വേഷണത്തിൽ വ്യക്തമാകുന്നത്.
കുഞ്ഞിനെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. മൃതദേഹത്തിൽ അസ്വാഭാവിക മുറിവുകൾ കണ്ടെത്തിയതിനെ തുടർന്ന് ഡോക്ടർ പൊലീസിനെ വിവരമറിയിക്കുകയായിരുന്നു.
ഭർത്താവ് അൽത്താഫ് ജോലി കഴിഞ്ഞ് വീട്ടിലെത്തിയപ്പോഴാണ് സംഭവവിവരം പുറത്തായത്. ഷംന അസ്വസ്ഥാവസ്ഥയിലായിരുന്നതിനാൽ ആശുപത്രിയിലേക്ക് കൊണ്ടുപോകുന്നതിനിടെയാണ് മുറിക്കുള്ളിൽ രക്തം പതിഞ്ഞ നിലയിൽ കുഞ്ഞിനെ കണ്ടെത്തിയത്.
പ്രാഥമിക ചോദ്യം ചെയ്യലിൽ, കുടുംബ സാഹചര്യങ്ങളും കുഞ്ഞിനെ നോക്കാനുള്ള ബുദ്ധിമുട്ടുകളും കാരണം ഇത്തരമൊരു പ്രവൃത്തിയിലേക്കു താൻ നീങ്ങിയതായി ഷംന പൊലീസിനോട് പറഞ്ഞു.
സംഭവത്തെ തുടർന്ന് ചികിത്സയിൽ തുടരുകയായിരുന്ന ഷംനയെ പൊലീസ് അറസ്റ്റ് ചെയ്തു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. കൂടുതൽ ചോദ്യം ചെയ്യലിനായി കസ്റ്റഡിയിൽ വാങ്ങാനുള്ള നടപടികൾ പുരോഗമിക്കുകയാണ്.
സുരക്ഷാ സന്ദേശം
മാനസിക സമ്മർദ്ദം, പ്രസവാനന്തര മാനസിക പ്രശ്നങ്ങൾ എന്നിവ അനുഭവപ്പെടുമ്പോൾ സഹായം തേടുന്നത് അത്യാവശ്യമാണ്.
‘ദിശ’ ഹെൽപ് ലൈൻ: 1056, 0471-2552056
English Summary
A woman has been arrested in Thiruvananthapuram for allegedly killing her newborn baby. The incident came to light after the child was brought to hospital. Police investigation is ongoing.
