പൂക്കോട്ടുംപാടത്ത് വാകത്തോട് മലിനമാക്കി; കടയുടമകൾക്കെതിരെ നടപടി
മലപ്പുറം: അമരമ്പലം പഞ്ചായത്തിലെ പൂക്കോട്ടുംപാടത്ത് വാകത്തോട്ടിലേക്ക് മലിനജലം ഒഴുക്കിയതിനെ തുടർന്ന് കടയുടമകൾക്കും കെട്ടിട ഉടമകൾക്കും അധികൃതർ പിഴ ചുമത്തി.
ജില്ലാ എൻഫോഴ്സ്മെന്റ് സ്പെഷ്യൽ സ്ക്വാഡ് നടത്തിയ പരിശോധനയിൽ നിയമലംഘനം കണ്ടെത്തിയ ആറ് കടകൾക്കും കെട്ടിട ഉടമകൾക്കുമാണ് 5,000 മുതൽ 25,000 രൂപ വരെ പിഴ ചുമത്തിയത്.
മലിനജലം നേരിട്ട് തോട്ടിലേക്ക് ഒഴുക്കിയത് കണ്ടെത്തി
പരിശോധനയിൽ ചില സ്ഥാപനങ്ങൾ മലിനജലം നേരിട്ട് തോട്ടിലേക്ക് ഒഴുക്കുന്നുവെന്ന് കണ്ടെത്തി. ഇതിനെ തുടർന്ന് ബന്ധപ്പെട്ട കടയുടമകൾക്കും കെട്ടിട ഉടമകൾക്കും പിഴ ഈടാക്കി.
ഗ്യാസ് ഉപഭോക്താക്കൾ ജാഗ്രത! സിലിണ്ടർ ബുക്ക് ചെയ്തോ? അക്കൗണ്ട് കാലിയാക്കാൻ പുതിയൊരു ‘കെണി’ വരുന്നു!
മാലിന്യ സംസ്കരണത്തിന് ഒരാഴ്ച സമയം
ശാസ്ത്രീയമായ മാലിന്യ സംസ്കരണ സംവിധാനങ്ങൾ ഒരുക്കാൻ ഒരാഴ്ച സമയം അധികൃതർ അനുവദിച്ചു.
നിശ്ചിത സമയത്തിനകം ആവശ്യമായ മാറ്റങ്ങൾ വരുത്തിയില്ലെങ്കിൽ പുനഃപരിശോധനക്ക് ശേഷം 50,000 രൂപ വരെ പിഴ ചുമത്തുകയും സ്ഥാപനങ്ങളുടെ ലൈസൻസ് റദ്ദാക്കുകയും ചെയ്യുമെന്ന് സ്ക്വാഡ് മുന്നറിയിപ്പ് നൽകി.
വാകത്തോട് പുനരുദ്ധാരണത്തിന് നിർദേശം
വാകത്തോടിന്റെ സംരക്ഷണത്തിനായി ജനകീയ കൂട്ടായ്മകളിലൂടെയോ തദ്ദേശ സ്ഥാപന പദ്ധതികളിലൂടെയോ പുനരുദ്ധാരണ പ്രവർത്തനങ്ങൾ നടത്തണമെന്ന് സ്ക്വാഡ് പഞ്ചായത്തോട് ആവശ്യപ്പെട്ടു.
തൊണ്ടി വാഹനങ്ങൾ ആരോഗ്യ പ്രശ്നമെന്ന് വിലയിരുത്തൽ
ബഡ്സ് സ്കൂളിന്റെയും സായംപ്രഭ ഹോമിന്റെയും മുൻവശത്ത് പോലീസ് പിടിച്ചെടുത്ത തൊണ്ടി വാഹനങ്ങൾ കെട്ടിക്കിടക്കുന്നത് ആരോഗ്യ പ്രശ്നങ്ങൾക്ക് കാരണമാകുന്നുവെന്ന് സ്ക്വാഡ് വിലയിരുത്തി.
ഇവ ഉടൻ നീക്കം ചെയ്യാൻ പോലീസിനോട് ആവശ്യപ്പെടാൻ പഞ്ചായത്തിനെ ചുമതലപ്പെടുത്തി.
ഉദ്യോഗസ്ഥരുടെ നേതൃത്വത്തിൽ പരിശോധന
ജില്ല എൻഫോഴ്സ്മെന്റ് സ്ക്വാഡ് ടീം ലീഡർ കെ.ടി. മുഹമ്മദ് മുസ്തഫ, അമരമ്പലം ഗ്രാമപഞ്ചായത്ത് അസി. സെക്രട്ടറി ബി. ശിവദാസ്, മലപ്പുറം ശുചിത്വ മിഷൻ പ്രോഗ്രാം ഓഫീസർ കെ. സിറാജുദ്ധീൻ, ഹെൽത്ത് ഇൻസ്പെക്ടർ പി.ടി. ഷാഹിദ എന്നിവരുടെ നേതൃത്വത്തിലാണ് പരിശോധന നടത്തിയത്.
English Summary:
Authorities in Malappuram’s Amarambalam panchayat fined six shops and building owners ₹5,000 to ₹25,000 for discharging wastewater into a small stream. The enforcement squad detected the violation during an inspection and ordered the owners to install proper waste management systems within a week. Officials also warned that failure to comply could lead to fines up to ₹50,000 and cancellation of licenses.
