വയോധികയെ ആക്രമിച്ച കേസിൽ പ്രതി  പൂവൻകോഴി! മുഖത്ത് 12 തുന്നലുകളുമായി വീട്ടമ്മ; കൊല്ലത്തെ ഞെട്ടിച്ച സംഭവം

വയോധികയെ ആക്രമിച്ച കേസിൽ പ്രതി  പൂവൻകോഴി! മുഖത്ത് 12 തുന്നലുകളുമായി വീട്ടമ്മ; കൊല്ലത്തെ ഞെട്ടിച്ച സംഭവം

കൊല്ലം: പൂയപ്പള്ളിയിൽ വയോധികയ്ക്ക് നേരെയുണ്ടായ ആക്രമണക്കേസിൽ പ്രതിയെ കണ്ടപ്പോൾ പോലീസുകാർ പോലും അമ്പരന്നു. കേസിലെ പ്രതി ഒരു പൂവൻകോഴിയായിരുന്നു. ആക്രമണത്തിൽ ഗുരുതരമായി പരിക്കേറ്റ വീട്ടമ്മയ്ക്ക് 12 തുന്നൽ ഇടേണ്ടിവന്നു.

പൂയപ്പള്ളി മരുതമൺപള്ളി സുജിത്ത് ഭവനിൽ ജോയിസ് (74) ആണ് ആക്രമണത്തിനിരയായത്. സമീപത്തെ കടയിൽ നിന്ന് വീട്ടിലേക്ക് മടങ്ങുന്നതിനിടെയാണ് പൂവൻകോഴി ആക്രമിച്ചത്.

ദേഹത്തേക്ക് ചാടിക്കയറിയ കോഴി തലയിൽ കയറി നിന്ന ശേഷം മുഖത്തും മൂക്കിനരികിലും ഇടത് പുരികത്തിനടുത്തും കൊത്തി പരിക്കേൽപ്പിക്കുകയായിരുന്നു. ജോയിസിന്റെ നിലവിളി കേട്ട് ഓടിയെത്തിയ നാട്ടുകാർ രക്തത്തിൽ കുളിച്ച നിലയിലാണ് അവരെ കണ്ടത്. തുടർന്ന് കോഴിയെ ഓടിച്ചുവിട്ട് ജോയിസിനെ പാരിപ്പള്ളി മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.

പരിശോധനയിൽ മുഖത്തെ മുറിവുകൾ ഗുരുതരമാണെന്ന് കണ്ടെത്തി. മുറിവുകൾ തുന്നിക്കെട്ടാൻ 12 സ്റ്റിച്ചുകൾ വേണ്ടിവന്നു. കണ്ണിനും പരിക്കേറ്റിട്ടുണ്ട്.

മുൻപും ഇതേ കോഴി ജോയിസിനെ ആക്രമിക്കാൻ ശ്രമിച്ചിട്ടുണ്ടെന്ന് വീട്ടുകാർ പറയുന്നു. യാതൊരു പ്രകോപനവും കൂടാതെയായിരുന്നു ആക്രമണമെന്ന് കുടുംബം വ്യക്തമാക്കി.

സംഭവത്തിൽ Kerala Policeയിൽ പരാതി നൽകിയെങ്കിലും പിന്നീട് ജോയിസിന്റെ അഭ്യർഥനപ്രകാരം കേസ് രജിസ്റ്റർ ചെയ്തില്ല. ഒടുവിൽ ‘പ്രതി’യായ പൂവൻകോഴിക്ക് മാപ്പ് നൽകി വീട്ടമ്മ കേസ് ഒഴിവാക്കുകയായിരുന്നു.

English Summary

Police in Kollam were surprised to discover that the accused in an assault case was a rooster. A 74-year-old woman suffered serious facial injuries and required 12 stitches after being attacked by the bird. Though a complaint was filed, the woman later chose not to pursue the case and “forgave” the rooster.