മിനിമം ബാലൻസ് പിഴ: മൂന്ന് വർഷത്തിനിടെ ഈടാക്കിയത് 8,000 കോടിയിലധികം

മിനിമം ബാലൻസ് പിഴ: മൂന്ന് വർഷത്തിനിടെ ഈടാക്കിയത് 8,000 കോടിയിലധികം

ന്യൂഡൽഹി ∙ കഴിഞ്ഞ മൂന്ന് സാമ്പത്തിക വർഷങ്ങളിലായി സേവിംഗ്സ് അക്കൗണ്ടുകളിൽ മിനിമം ബാലൻസ് നിലനിർത്താത്തതിന്റെ പേരിൽ പൊതുമേഖലാ ബാങ്കുകൾ (PSB) ഉപഭോക്താക്കളിൽ നിന്ന് 8,000 കോടി രൂപയ്ക്കും മേൽ പിഴ ഈടാക്കിയതായി കണക്കുകൾ വ്യക്തമാക്കുന്നു.

രാജ്യത്തെ 12 പ്രമുഖ പൊതുമേഖലാ ബാങ്കുകളാണ് ഈ കാലയളവിൽ പിഴത്തുക ഈടാക്കിയത്.

സാധാരണക്കാർക്ക് ബാങ്കിംഗ് സേവനങ്ങൾ കൂടുതൽ ലഭ്യമാക്കണമെന്ന ലക്ഷ്യത്തോടെ സർക്കാർ വിവിധ പദ്ധതികൾ നടപ്പാക്കുന്നതിനിടെയാണ് ഇത്തരത്തിൽ വൻതുക പിഴയായി ഈടാക്കുന്നത് എന്നത് ശ്രദ്ധേയമാണ്.

കേന്ദ്ര സർക്കാർ പാർലമെന്റിൽ അവതരിപ്പിച്ച കണക്കുകൾ പ്രകാരം, മിനിമം ബാലൻസ് പിഴ ഈടാക്കുന്നതിൽ പഞ്ചാബ് നാഷണൽ ബാങ്ക് (PNB) ആണ് ഒന്നാമത്.

കഴിഞ്ഞ മൂന്ന് വർഷത്തിനിടെ പി.എൻ.ബി മാത്രം ഉപഭോക്താക്കളിൽ നിന്ന് ഏകദേശം 1,500 കോടി രൂപ പിഴയായി ഈടാക്കി — പൊതുമേഖലാ ബാങ്കുകളിൽ ഏറ്റവും ഉയർന്ന തുകയാണിത്.

പി.എൻ.ബിക്ക് പിന്നാലെ ബാങ്ക് ഓഫ് ബറോഡ 1,272 കോടി രൂപയും, ഇന്ത്യൻ ബാങ്ക് 1,166 കോടി രൂപയും പിഴയായി ഈടാക്കി.

കാനറ ബാങ്ക് 1,027 കോടി രൂപയും, രാജ്യത്തെ ഏറ്റവും വലിയ ബാങ്കായ സ്റ്റേറ്റ് ബാങ്ക് ഓഫ് ഇന്ത്യ (SBI) 932 കോടി രൂപയും ഉപഭോക്താക്കളിൽ നിന്ന് ഈടാക്കിയിട്ടുണ്ട്.

മിനിമം ബാലൻസ് പിഴയ്ക്ക് പുറമേ, എസ്എംഎസ് അലർട്ട് സേവനത്തിനും ഉപഭോക്താക്കൾക്ക് വലിയ തുക ചെലവഴിക്കേണ്ടിവന്നിട്ടുണ്ട്.

എസ്എബിഐ ഒഴികെയുള്ള മറ്റ് പൊതുമേഖലാ ബാങ്കുകൾ കഴിഞ്ഞ മൂന്ന് വർഷത്തിനിടെ എസ്എംഎസ് സേവനങ്ങളുടെ പേരിൽ ഉപഭോക്താക്കളിൽ നിന്ന് 3,388 കോടി രൂപ ഈടാക്കിയതായി കേന്ദ്ര സർക്കാർ പാർലമെന്റിൽ അറിയിച്ചു.

അതേസമയം, സേവിംഗ്സ് ബാങ്ക് ഡെപ്പോസിറ്റ് അക്കൗണ്ടുകൾ (BSBDA), പ്രധാൻ മന്ത്രി ജൻധൻ യോജന (PMJDY) പ്രകാരം തുറക്കുന്ന അക്കൗണ്ടുകൾ തുടങ്ങിയ സീറോ ബാലൻസ് സേവിംഗ്സ് അക്കൗണ്ടുകൾ ബാങ്കുകൾ വാഗ്ദാനം ചെയ്യുന്നുണ്ടെന്നും, ഇത്തരം അക്കൗണ്ടുകൾക്ക് മിനിമം ബാലൻസ് നിലനിർത്തേണ്ടതില്ലെന്നും സർക്കാർ വ്യക്തമാക്കി.

English Summary

Public sector banks in India collected over ₹8,000 crore as penalties from customers for failing to maintain minimum balance in savings accounts over the past three financial years. According to data presented in Parliament, Punjab National Bank topped the list with ₹1,500 crore in penalties, followed by Bank of Baroda, Indian Bank, Canara Bank and SBI. Additionally, excluding SBI, other PSBs collected ₹3,388 crore through SMS alert charges. The government clarified that zero-balance accounts such as Jan Dhan and basic savings accounts remain exempt from minimum balance requirements.

public-sector-banks-minimum-balance-penalty-8000-crore

public sector banks, minimum balance penalty, PNB, SBI, Bank of Baroda, SMS charges, banking news India, Jan Dhan accounts