ബെംഗളൂരുവിൽ ഇലക്ട്രിക് സ്കൂട്ടർ ബാറ്ററി പൊട്ടിത്തെറിച്ചു വയോധികന് ദാരുണാന്ത്യം
ബെംഗളൂരുവിൽ ഇലക്ട്രിക് സ്കൂട്ടർ ചാർജ് ചെയ്യുന്നതിനിടെ ബാറ്ററി പൊട്ടിത്തെറിച്ചുണ്ടായ അഗ്നിബാധയിൽ 65-കാരനായ വയോധികൻ മരിച്ചു. അൾസൂർ സ്വദേശിയായ ലൂർദ്നാഥൻ ആണ് മരിച്ചത്.
പുലർച്ചെ മൂന്ന് മണിയോടെ നടന്ന അപകടം ഇലക്ട്രിക് വാഹനങ്ങളുടെ സുരക്ഷയെ സംബന്ധിച്ച ആശങ്കകൾ വീണ്ടും വർദ്ധിപ്പിച്ചിരിക്കുകയാണ്.
വീടിനുള്ളിലെ ഹാളിനോട് ചേർന്ന ഭാഗത്താണ് സ്കൂട്ടർ രാത്രിയിൽ ചാർജ് ചെയ്യാനായി വെച്ചിരുന്നത്. ഈ സമയത്ത് ഹാളിൽ ഉറങ്ങിക്കിടക്കുകയായിരുന്ന ലൂർദ്നാഥന്, ബാറ്ററി പൊട്ടിത്തെറിച്ചുണ്ടായ തീപടർന്നതിനെ തുടർന്ന് ഗുരുതരമായി പൊള്ളലേൽക്കുകയായിരുന്നു.
വലിയ ശബ്ദം കേട്ട് ഉണർന്ന മകൻ ഫ്രാങ്ക് ആന്റണിയും കുടുംബാംഗങ്ങളും അയൽക്കാരും ചേർന്ന് തീയണയ്ക്കാൻ ശ്രമിച്ചെങ്കിലും അപ്പോഴേക്കും ലൂർദ്നാഥൻ മരണപ്പെട്ടിരുന്നു.
ദീർഘനേരം ചാർജ് ചെയ്തതിനെ തുടർന്ന് ബാറ്ററിയിലുണ്ടായ അമിതമായ ചൂടാണ് (Overheating) സ്ഫോടനത്തിന് കാരണമായതെന്നാണ് പ്രാഥമിക നിഗമനം.
സ്കൂട്ടറിൽ നിന്ന് ഹാളിന്റെ മറ്റ് ഭാഗങ്ങളിലേക്കും തീ വേഗത്തിൽ പടർന്നത് രക്ഷാപ്രവർത്തനത്തിന് തടസ്സമായി. ഫയർഫോഴ്സും പോലീസും സ്ഥലത്തെത്തി പ്രാഥമിക പരിശോധനകൾ പൂർത്തിയാക്കി.
ഇലക്ട്രിക് വാഹനങ്ങൾ ചാർജ് ചെയ്യുമ്പോൾ പാലിക്കേണ്ട സുരക്ഷാ മാനദണ്ഡങ്ങൾ ലംഘിക്കുന്നതാണ് ഇത്തരം അപകടങ്ങൾക്ക് കാരണമാകുന്നതെന്ന് വിദഗ്ധർ ചൂണ്ടിക്കാട്ടുന്നു.
വീട്ടിലെ ഹാളിനുള്ളിലോ കിടപ്പുമുറികളോട് ചേർന്നോ ഇത്തരത്തിൽ വാഹനങ്ങൾ ചാർജ് ചെയ്യുന്നത് വലിയ അപകടങ്ങൾക്ക് വഴിവെക്കുമെന്ന് അധികൃതർ മുന്നറിയിപ്പ് നൽകി. സംഭവത്തിൽ പോലീസ് കേസെടുത്ത് വിശദമായ അന്വേഷണം ആരംഭിച്ചിട്ടുണ്ട്.
