ഉത്തരക്കടലാസ് പരിശോധന ഇനി കമ്പ്യൂട്ടറിലൂടെ; പന്ത്രണ്ടാം ക്ലാസിൽ ഡിജിറ്റൽ മൂല്യനിർണ്ണയം
ന്യൂഡൽഹി ∙ സിബിഎസ്ഇ പന്ത്രണ്ടാം ക്ലാസ് പരീക്ഷാഫലങ്ങൾ ഇനി കൂടുതൽ വേഗത്തിലും കൃത്യതയോടെയും ലഭ്യമാകും.
2026ലെ ബോർഡ് പരീക്ഷ മുതൽ ഉത്തരക്കടലാസുകൾ ഡിജിറ്റൽ രീതിയിൽ വിലയിരുത്തുന്ന ഓൺ-സ്ക്രീൻ മാർക്കിങ് (OSM) സംവിധാനം നടപ്പാക്കാൻ സിബിഎസ്ഇ തീരുമാനിച്ചു.
മൂല്യനിർണ്ണയത്തിലെ പിശകുകൾ കുറയ്ക്കുകയും കൂടുതൽ സുതാര്യത ഉറപ്പാക്കുകയും ചെയ്യുന്നതാണ് ലക്ഷ്യം.
പുതിയ സംവിധാനത്തിൽ ഉത്തരക്കടലാസുകൾ സ്കാൻ ചെയ്ത് ഡിജിറ്റൽ രൂപത്തിലാക്കി അധ്യാപകർക്ക് ലഭ്യമാക്കും. കമ്പ്യൂട്ടർ സ്ക്രീനിൽ നിന്ന് നേരിട്ടാണ് മാർക്കുകൾ രേഖപ്പെടുത്തുന്നത്.
സോഫ്റ്റ്വെയർ വഴിയാണ് മൊത്തം മാർക്ക് കണക്കാക്കുക, ഇതോടെ അക്കങ്ങൾ കൂട്ടുന്നതിലെ മാനുവൽ പിശകുകൾ ഒഴിവാക്കാനാകും. പുനർമൂല്യനിർണ്ണയ ആവശ്യങ്ങൾ ഗണ്യമായി കുറയുമെന്നതും ബോർഡ് വിലയിരുത്തുന്നു.
ആദ്യഘട്ടത്തിൽ പന്ത്രണ്ടാം ക്ലാസ് പരീക്ഷകൾക്കാണ് ഓൺ-സ്ക്രീൻ മാർക്കിങ് സംവിധാനം നടപ്പാക്കുന്നത്. പത്താം ക്ലാസ് മൂല്യനിർണ്ണയം നിലവിലെ രീതിയിൽ തന്നെ തുടരും.
നിശ്ചിത മൂല്യനിർണ്ണയ കേന്ദ്രങ്ങളിൽ പോകാതെ തന്നെ അധ്യാപകർക്ക് സ്വന്തം സ്കൂളുകളിൽ ഇരുന്ന് മൂല്യനിർണ്ണയം നടത്താൻ സാധിക്കുന്നതും പുതിയ സംവിധാനത്തിന്റെ പ്രത്യേകതയാണ്. ഇതോടെ സമയം ലാഭിക്കാനാകുമെന്നും സിബിഎസ്ഇ വ്യക്തമാക്കി.
ഡിജിറ്റൽ മൂല്യനിർണ്ണയത്തിനായി സ്കൂളുകളിൽ ആവശ്യമായ സാങ്കേതിക സൗകര്യങ്ങൾ ഒരുക്കണമെന്ന് ബോർഡ് നിർദേശിച്ചു.
കുറഞ്ഞത് 4 ജിബി റാം ഉള്ള കമ്പ്യൂട്ടറുകൾ, വിൻഡോസ് 8-ന് മുകളിലുള്ള ഓപ്പറേറ്റിംഗ് സിസ്റ്റം, തടസ്സമില്ലാത്ത ഹൈ-സ്പീഡ് ഇന്റർനെറ്റ് കണക്ഷൻ എന്നിവ നിർബന്ധമായും ഉണ്ടാകണം.
അധ്യാപകരെ പുതിയ സംവിധാനവുമായി പരിചയപ്പെടുത്തുന്നതിനായി പരിശീലന വീഡിയോകളും വെബിനാറുകളും സിബിഎസ്ഇ സംഘടിപ്പിക്കും. പരീക്ഷയ്ക്ക് മുമ്പായി ‘ഡ്രൈ റൺ’ പരീക്ഷണങ്ങളും നടത്തും.
സാങ്കേതിക പ്രശ്നങ്ങൾ പരിഹരിക്കാൻ പ്രത്യേക കോൾ സെന്ററുകളും ആരംഭിക്കാനുള്ള പദ്ധതിയും ബോർഡ് പ്രഖ്യാപിച്ചിട്ടുണ്ട്.
English Summary
The CBSE has decided to introduce digital evaluation of answer sheets for Class 12 board examinations starting from 2026 through an On-Screen Marking (OSM) system. Answer papers will be scanned and evaluated digitally by teachers, reducing calculation errors and speeding up result processing. Initially, the system will apply only to Class 12, while Class 10 evaluations will continue as before. CBSE has instructed schools to ensure proper technical infrastructure and will provide training, trial runs, and technical support for smooth implementation.
cbse-class-12-digital-evaluation-on-screen-marking-2026
CBSE, Class 12 exams, digital evaluation, on-screen marking, board exams 2026, education news India, answer sheet valuation
