മഞ്ഞുരുകി! കെസിയും വിഡിയും ഒരുമിച്ച്: വി.ഡി. സതീശൻ മന്ത്രിസഭയ്ക്ക് ‘പൂർണ പിന്തുണ’ പ്രഖ്യാപിച്ച് കെ.സി. വേണുഗോപാൽ
തിരുവനന്തപുരം: നിയുക്ത മുഖ്യമന്ത്രി വി.ഡി. സതീശനും എ.ഐ.സി.സി ജനറൽ സെക്രട്ടറി കെ.സി. വേണുഗോപാലും തമ്മിലുള്ള രാഷ്ട്രീയ അകലം അവസാനിച്ചതിന്റെ സൂചന നൽകി ഇരുവരും ഒരുമിച്ച് മാധ്യമങ്ങൾക്കുമുന്നിലെത്തി. മുഖ്യമന്ത്രി പ്രഖ്യാപനത്തിന് ശേഷം ആദ്യമായാണ് വി.ഡി. സതീശൻ കെ.സി. വേണുഗോപാലിനെ അദ്ദേഹത്തിന്റെ വസതിയിലെത്തി കാണുന്നത്.
അരമണിക്കൂറിലേറെ നീണ്ട കൂടിക്കാഴ്ചയ്ക്ക് ശേഷം ഇരുവരും മാധ്യമങ്ങളോട് ഐക്യസന്ദേശം നൽകി. വി.ഡി. സതീശൻ മന്ത്രിസഭയ്ക്ക് പൂർണ പിന്തുണ നൽകുമെന്ന് കെ.സി. വേണുഗോപാൽ വ്യക്തമാക്കി. പാർട്ടി തീരുമാനങ്ങളിൽ ഉറച്ചുനിൽക്കുമെന്നും അദ്ദേഹം പറഞ്ഞു.
“കോൺഗ്രസ് നേതാക്കൾ ആരുടേയെങ്കിലും വേണ്ടി വാശിപിടിക്കുന്നവരല്ല. എല്ലാ കാര്യങ്ങളും ആലോചിച്ചാണ് തീരുമാനമെടുക്കുന്നത്,” എന്നായിരുന്നു വി.ഡി. സതീശന്റെ പ്രതികരണം. മന്ത്രിസഭയുടെ അന്തിമ പട്ടിക നാളെ ഉച്ചയോടെ ഗവർണർക്ക് കൈമാറുമെന്നും നിയുക്ത മുഖ്യമന്ത്രി അറിയിച്ചു.
ഡൽഹിയിൽ നിന്ന് ഇന്നലെ വൈകിട്ടാണ് കെ.സി. വേണുഗോപാൽ തിരുവനന്തപുരത്തെത്തിയത്. പിന്നാലെ തന്നെ വി.ഡി. സതീശൻ അദ്ദേഹത്തെ കാണാനെത്തുകയായിരുന്നു. മന്ത്രിസഭ രൂപീകരണ ചർച്ചകൾ ചൂടുപിടിക്കുന്ന സാഹചര്യത്തിലാണ് നിർണായക കൂടിക്കാഴ്ച നടന്നത്.
അതേസമയം പുതിയ മന്ത്രിസഭയുടെ രൂപീകരണവുമായി ബന്ധപ്പെട്ട ചർച്ചകൾ തുടരുകയാണ്. മുസ്ലിം ലീഗ് അഞ്ച് മന്ത്രിസ്ഥാനങ്ങൾ ആവശ്യപ്പെട്ടിട്ടുണ്ടെങ്കിലും കോൺഗ്രസ് നാല് മന്ത്രിസ്ഥാനം കൂടാതെ ഭരണപരിഷ്കാര കമ്മീഷൻ അധ്യക്ഷ പദവിയാണ് പരിഗണിക്കുന്നതെന്നാണ് വിവരം. ജോസഫ് വിഭാഗം രണ്ട് മന്ത്രിസ്ഥാനം ആവശ്യപ്പെട്ടിട്ടുള്ളതും കോൺഗ്രസിന് വെല്ലുവിളിയായിരിക്കുകയാണ്.
ഇതിനിടെ രമേശ് ചെന്നിത്തലയെ ആഭ്യന്തര മന്ത്രിസ്ഥാനം നൽകി മന്ത്രിസഭയിലേക്ക് എത്തിക്കുമോയെന്ന ചർച്ചയും സജീവമാണ്. കോൺഗ്രസിൽ നിന്ന് ആരൊക്കെയാണ് മന്ത്രിസഭയിലെത്തുക എന്നതിൽ അടുത്ത മണിക്കൂറുകളിൽ കൂടുതൽ വ്യക്തത പ്രതീക്ഷിക്കപ്പെടുന്നു.
English Summary
Kerala Chief Minister-designate V.D. Satheesan and AICC General Secretary K.C. Venugopal projected unity after holding a crucial meeting in Thiruvananthapuram. The two leaders jointly addressed the media for the first time since Satheesan’s elevation, with Venugopal assuring full support to the new cabinet. Satheesan said Congress leaders would take collective decisions without personal pressure politics. Cabinet formation talks continue, with discussions ongoing over ministerial allocations for alliance partners including the Muslim League and Joseph faction.
