ഇന്ധനവിലയിൽ വൻ കുതിപ്പ്! പ്രീമിയം പെട്രോൾ ലിറ്ററിന് 160 രൂപ; വിമാന ഇന്ധനവില റെക്കോർഡ് ഉയരത്തിൽ
ന്യൂഡൽഹി: പശ്ചിമേഷ്യയിലെ സംഘർഷ സാഹചര്യങ്ങൾക്കിടെ രാജ്യത്ത് പ്രീമിയം ഇന്ധനങ്ങളുടെ വില ഉയർന്നു. ഇന്ത്യൻ ഓയിൽ കോർപ്പറേഷൻ (IOC) വിൽക്കുന്ന എക്സ്പി 100 പെട്രോളിന്റെ വില ₹149ൽ നിന്ന് ₹160 ആയി വർധിപ്പിച്ചു.
ഡീസൽ എക്സ്ട്രാ ഗ്രീന്റെ വിലയും ₹91.49ൽ നിന്ന് ₹92.99 ആയി ഉയർന്നു. വില വർധനവിന്റെ ഔദ്യോഗിക കാരണം ഇന്ത്യൻ ഓയിൽ വ്യക്തമാക്കിയിട്ടില്ലെങ്കിലും, ആഗോള അസംസ്കൃത എണ്ണവിലയിലെ ചാഞ്ചാട്ടവും യുഎസ്–ഇറാൻ സംഘർഷവും പ്രധാന ഘടകങ്ങളായാണ് വിലയിരുത്തൽ.
ഇതിനിടെ വിമാന ഇന്ധനമായ എയർ ടർബൈൻ ഫ്യൂവൽ (ATF) വിലയിൽ വൻ കുതിപ്പ് രേഖപ്പെടുത്തി. കിലോലിറ്ററിന് ₹2.07 ലക്ഷം ആയി ഉയർന്നത് ചരിത്രത്തിൽ ആദ്യമായാണ് ₹2 ലക്ഷം കടക്കുന്നത്. 2022ൽ രേഖപ്പെടുത്തിയ ₹1.1 ലക്ഷം ആയിരുന്നു ഇതുവരെ ഏറ്റവും ഉയർന്ന നിരക്ക്.
ഇന്ധനവില വർധനവിന് പിന്നാലെ ഗതാഗതച്ചെലവും ചരക്കുവിലയും കൂടാനിടയുണ്ടെന്ന് വിപണി വിദഗ്ധർ മുന്നറിയിപ്പ് നൽകുന്നു.
English Summary
Premium fuel prices have increased in India amid global tensions. XP100 petrol now costs ₹160, while aviation fuel prices have crossed ₹2 lakh per kilolitre for the first time.
