പ്രണയപ്പകയിൽ പൊലിഞ്ഞത്  നവവരന്റെ ജീവൻ; പത്ത് മാസത്തെ ജയിൽവാസത്തിന് ശേഷം സോനം രഘുവംശിക്ക് ജാമ്യം

പ്രണയപ്പകയിൽ പൊലിഞ്ഞത്  നവവരന്റെ ജീവൻ; പത്ത് മാസത്തെ ജയിൽവാസത്തിന് ശേഷം സോനം രഘുവംശിക്ക് ജാമ്യം

ഗുവാഹത്തി: ഹണിമൂൺ യാത്രയ്ക്കിടെ ഭർത്താവിനെ കൊലപ്പെടുത്തിയ കേസിൽ അറസ്റ്റിലായ യുവതി സോനം രഘുവംശിക്ക് ജാമ്യം അനുവദിച്ചു. ഇൻഡോർ സ്വദേശിനിയായ സോനത്തിന് ഷില്ലോങ്ങിലെ ഈസ്റ്റ് ഖാസി ഹിൽസ് ജില്ലാ ആൻഡ് സെഷൻസ് കോടതിയാണ് ജാമ്യം നൽകിയത്. ഏകദേശം പത്ത് മാസം ജയിലിൽ കഴിഞ്ഞ ശേഷമാണ് സോനം പുറത്തിറങ്ങുന്നത്. ഇതിന് മുമ്പ് നൽകിയ മൂന്ന് ജാമ്യാപേക്ഷകളും കോടതി തള്ളിയിരുന്നു.

2025 മെയ് മാസത്തിൽ മേഘാലയയിലെ ഈസ്റ്റ് ഖാസി ഹിൽസ് ജില്ലയിലേക്കുള്ള ഹണിമൂൺ യാത്രയ്ക്കിടെ ഭർത്താവ് രാജ രഘുവംശിയെ കാമുകനുമായി ചേർന്ന് കൊലപ്പെടുത്തിയെന്നാണ് കേസ്. സോഹ്‌റ സന്ദർശനത്തിന് പിന്നാലെ ദമ്പതികളെ കാണാതാവുകയും, തുടർന്ന് നടത്തിയ തിരച്ചിലിൽ ജൂൺ 2ന് ഒരു വെള്ളച്ചാട്ടത്തിനടുത്തുള്ള കൊക്കയിൽ നിന്ന് രാജയുടെ മൃതദേഹം കണ്ടെത്തുകയും ചെയ്തു.

പിന്നീട് അറസ്റ്റിലായ സോനം, തന്റെ കാമുകനായ രാജ് കുശ്വാഹയുടെയും മറ്റ് മൂന്ന് പേരുടെയും സഹായത്തോടെ കൊലപാതകം ആസൂത്രണം ചെയ്തതായി അന്വേഷണത്തിൽ വെളിപ്പെടുത്തിയെന്നാണ് പൊലീസ് വ്യക്തമാക്കുന്നത്. കുശ്വാഹയും മറ്റ് പ്രതികളും ഇപ്പോഴും കസ്റ്റഡിയിൽ തുടരുന്നു.

അന്വേഷണം പൂർത്തിയായതും 790 പേജുകളുള്ള കുറ്റപത്രം സമർപ്പിച്ചതും പരിഗണിച്ചാണ് കോടതി ജാമ്യം അനുവദിച്ചത്. അന്വേഷണവുമായി സഹകരിച്ചതും തുടർന്നും സഹകരിക്കാമെന്ന ഉറപ്പും കോടതി രേഖപ്പെടുത്തി. ജാമ്യ നിബന്ധനകൾ പാലിക്കാൻ ആവശ്യമായ തുക അടയ്ക്കാൻ സോനത്തിന്റെ കുടുംബാംഗങ്ങൾ ഷില്ലോങ്ങിലെത്തി.

കേസിന് പിന്നിലെ പശ്ചാത്തലം

ഇൻഡോറിലെ കർശനമായ കുടുംബാന്തരീക്ഷത്തിൽ വളർന്ന സോനം, ഉയർന്ന വിദ്യാഭ്യാസവും സ്വാതന്ത്ര്യവും ആഗ്രഹിച്ചിരുന്നുവെന്നാണ് വിവരം. കുടുംബത്തിന്റെ നിയന്ത്രണങ്ങൾക്കിടയിൽ ജീവിച്ചിരുന്ന സോനം പിന്നീട് പിതാവിന്റെ സ്ഥാപനത്തിൽ ജോലി ചെയ്തിരുന്ന രാജ് കുശ്വാഹയുമായി അടുത്തതായി. ഇതേസമയം കുടുംബം വിവാഹം നിശ്ചയിച്ചതോടെ രാജ രഘുവംശിയുമായി സോനത്തിന്റെ വിവാഹം നടന്നു.

വിവാഹത്തിന് പിന്നാലെ ഹണിമൂൺ യാത്രയുടെ പേരിൽ പുറപ്പെട്ടപ്പോഴാണ് കൊലപാതക പദ്ധതി നടപ്പാക്കിയതെന്നാണ് അന്വേഷണത്തിൽ കണ്ടെത്തിയത്.

English Summary

A woman accused of killing her husband during their honeymoon in Meghalaya has been granted bail after spending around 10 months in jail. The court considered completion of investigation and filing of the charge sheet. She allegedly conspired with her lover and others in the murder.