ചെന്നൈയിൽ വൻ ലഹരിവേട്ട: മലയാള നടി ഉൾപ്പെടെ എട്ടുപേർ പിടിയിൽ

ചെന്നൈയിൽ വൻ ലഹരിവേട്ട: മലയാള നടി ഉൾപ്പെടെ എട്ടുപേർ പിടിയിൽ


ചെന്നൈയിൽ ആന്റി നാർക്കോട്ടിക് ഇന്റലിജൻസ് യൂണിറ്റ് നടത്തിയ വൻ ലഹരിവേട്ടയിൽ മലയാളിയായ യുവനടി അഞ്ജു കൃഷ്ണയും തമിഴ് സിനിമയിലെ സഹസംവിധായിക വിൻസി നിവേദയും ഉൾപ്പെടെ എട്ടുപേർ പോലീസിന്റെ പിടിയിലായി.

മോഡലിംഗിലൂടെ സിനിമയിലെത്തിയ അഞ്ജു കൃഷ്ണ തമിഴ് ചിത്രമായ ‘വെള്ളിമലൈ’, ജോജു ജോർജ് കേന്ദ്രകഥാപാത്രമായെത്തിയ മലയാള ചിത്രം ‘ആരോ’ എന്നിവയിൽ ശ്രദ്ധേയമായ വേഷങ്ങൾ ചെയ്തിട്ടുണ്ട്.

നിരവധി സീരിയലുകളിലും ഇവർ അഭിനയിച്ചിട്ടുണ്ട്. മെത്താംഫെറ്റമിൻ, എൽഎസ്ഡി സ്റ്റാംപുകൾ, കഞ്ചാവ് തുടങ്ങിയ മാരക ലഹരിമരുന്നുകളുമായാണ് സംഘത്തെ പോലീസ് പിടികൂടിയത്.


നെശപ്പാക്കം സ്വദേശിയായ വിഘ്‌നേശ്വരൻ എന്നയാളെ ആദ്യം പിടികൂടിയതോടെയാണ് നഗരം കേന്ദ്രീകരിച്ച് പ്രവർത്തിക്കുന്ന വലിയൊരു ലഹരി ശൃംഖലയെക്കുറിച്ചുള്ള വിവരങ്ങൾ പുറത്തുവന്നത്.

ഇയാളിൽ നിന്ന് ലഭിച്ച സൂചനകളുടെ അടിസ്ഥാനത്തിൽ ലഹരിമരുന്ന് ആവശ്യക്കാരെന്ന വ്യാജേന പോലീസ് വേഷംമാറി ലഹരി ഇടപാടുകാരനായ വെങ്കിടേഷ് കുമാറിനെ സമീപിച്ചു.

തുടർന്ന് വത്സരവാക്കത്ത് വെച്ച് ലഹരിമരുന്ന് കൈമാറാൻ കാറിലെത്തിയ വെങ്കിടേഷ് കുമാറിനെയും സംഘത്തെയും പോലീസ് സാഹസികമായി വളയുകയായിരുന്നു.


അഞ്ജു കൃഷ്ണ (30), വിൻസി നിവേദ (26), കാർത്തിക് രാജ (31), യശ്വന്ത് (25), ശ്രീറാം (33), അൽവിബിൻഷ (27), വെങ്കിടേഷ് കുമാർ (31) എന്നിവരാണ് കേസിൽ അറസ്റ്റിലായ പ്രധാനികൾ.

ഇവരിൽ നിന്ന് 6 ഗ്രാം മെത്താംഫെറ്റമിൻ, 7 ഗ്രാം ഒജി കഞ്ചാവ്, 15 ഗ്രാം കഞ്ചാവ്, ഒരു എൽഎസ്ഡി സ്റ്റാംപ് എന്നിവ കൂടാതെ ഒൻപത് മൊബൈൽ ഫോണുകളും പോലീസ് കണ്ടുകെട്ടി.

പിടിയിലായവരെ കേന്ദ്രീകരിച്ച് കൂടുതൽ അന്വേഷണം പുരോഗമിക്കുകയാണ്.


Drug Bust, Chennai Police, Anju Krishna, Narcotic Intelligence, Kerala Actress Arrested