മകളുടെ ശരീരം കഷണങ്ങളാക്കി ട്രെയിനിലെ പെട്ടിയിലാക്കി; ദുരഭിമാനക്കൊലയ്ക്ക് പിന്നിൽ സ്വന്തം പിതാവ്!
ലഖ്നൗ: ഉത്തർപ്രദേശിലെ ലഖ്നൗവിൽ കൗമാരക്കാരിയുടെ മൃതദേഹാവശിഷ്ടങ്ങൾ ട്രെയിനിൽ നിന്ന് കണ്ടെത്തിയ സംഭവത്തിൽ ദുരഭിമാനക്കൊലയാണെന്ന നിഗമനത്തിലെത്തി പൊലീസ്. പെൺകുട്ടിയുടെ പിതാവാണ് കൊലപാതകം നടത്തിയതെന്നാണ് അന്വേഷണസംഘത്തിന്റെ കണ്ടെത്തൽ.
മെയ് 17നാണ് ഗോമതി നഗർ റെയിൽവേ സ്റ്റേഷനിൽ നിർത്തിയിട്ടിരുന്ന ട്രെയിനിന്റെ സ്ലീപ്പർ കോച്ചിൽ ടിൻ പെട്ടിക്കുള്ളിൽ മൃതദേഹാവശിഷ്ടങ്ങൾ കണ്ടെത്തിയത്. കൊല്ലപ്പെട്ടത് ഷബ്ബ എന്ന 15കാരിയാണെന്ന് പിന്നീട് തിരിച്ചറിഞ്ഞു.
പെൺകുട്ടിയുടെ തലയറ്റ ശരീരം ഒരു ടിൻ പെട്ടിയിലും കൈകാലുകൾ മറ്റൊരു ബാഗിലുമായിട്ടാണ് കണ്ടെത്തിയത്. സംഭവത്തിന്റെ ക്രൂരത പ്രദേശത്തെ ഞെട്ടിച്ചിരിക്കുകയാണ്.
മറ്റൊരു സമുദായത്തിൽപ്പെട്ട യുവാവുമായി ഷബ്ബ പ്രണയത്തിലായിരുന്നുവെന്ന് പൊലീസ് പറഞ്ഞു. ഈ ബന്ധത്തെ പിതാവായ ബിഗ്ഗൻ അൻസാരി ശക്തമായി എതിർത്തിരുന്നു. ബന്ധം അവസാനിപ്പിക്കാൻ മകളെ നിർബന്ധിച്ചിരുന്നുവെങ്കിലും ഷബ്ബ ബന്ധം തുടർന്നതോടെ കുടുംബത്തിന് നാണക്കേടുണ്ടാകുമെന്ന ഭയം അൻസാരിക്കുണ്ടായിരുന്നുവെന്നാണ് പൊലീസ് പറയുന്നത്.
മുൻപ് കുടുംബത്തിലെ മറ്റ് രണ്ട് പെൺമക്കൾ വീടുവിട്ടുപോയ സംഭവങ്ങളും അൻസാരിയെ കൂടുതൽ ആശങ്കപ്പെടുത്തുകയുണ്ടായി. ഷബ്ബയും അങ്ങനെ ചെയ്യുമെന്ന ഭയമാണ് കൊലപാതകത്തിലേക്ക് നയിച്ചതെന്നാണ് അന്വേഷണസംഘത്തിന്റെ നിഗമനം.
സംഭവദിവസം ഭാര്യയെയും രണ്ട് മക്കളെയും ബന്ധുവീട്ടിലേക്ക് അയച്ച ശേഷമാണ് അൻസാരി കൊലപാതകം നടത്തിയതെന്ന് പൊലീസ് വ്യക്തമാക്കി. സഹോദരി നൂർജഹാനും ഭർത്താവ് മുജീബുള്ളയും സംഭവത്തിൽ സഹായിച്ചതായും കണ്ടെത്തിയിട്ടുണ്ട്.
കുഷിനഗറിലെ തംകുഹി റോഡ് റെയിൽവേ സ്റ്റേഷനിൽ നിന്ന് ടിൻ പെട്ടി ട്രെയിനിൽ കയറ്റുന്നതിന്റെ സി.സി.ടി.വി ദൃശ്യങ്ങൾ അന്വേഷണത്തിൽ നിർണായകമായി. ദൃശ്യങ്ങളിലെ ആളുകളെ തിരിച്ചറിഞ്ഞതോടെയാണ് പ്രതികളിലേക്ക് പൊലീസ് എത്തിയത്.
മകളെ തിരിച്ചറിയാതിരിക്കാൻ തല കുളത്തിൽ ഉപേക്ഷിച്ചുവെന്നും ശരീരഭാഗങ്ങൾ വേർതിരിച്ച് ട്രെയിനിൽ ഉപേക്ഷിച്ചതായും അന്വേഷണത്തിൽ വ്യക്തമായി.
സംഭവത്തിൽ കൂടുതൽ അന്വേഷണം പുരോഗമിക്കുകയാണെന്നും പ്രതികൾക്കെതിരെ കടുത്ത നിയമനടപടികൾ സ്വീകരിക്കുമെന്നും പൊലീസ് അറിയിച്ചു.
English Summary
Police in Lucknow suspect an honour killing after the dismembered body of a 15-year-old girl was found inside a train coach. Investigators allege that the girl’s father killed her over an interfaith relationship and later disposed of the body with help from relatives.
lucknow-honour-killing-teen-girls-body-found-in-train
Lucknow, Honour Killing, Uttar Pradesh, Crime News, Railway Station, Murder Case, National News, Police Investigation, India News
