ഉയർന്ന ശമ്പളവും ആർട്ടിസ്റ്റ് വിസയും കെണി! ഇവന്റ് മാനേജ്മെന്റിന്റെ മറവിൽ വൻ മാഫിയ കളി! പെരുമ്പാവൂർ സ്വദേശിനി സ്റ്റോയ്സിയും അലീനയും പുതുമുഖങ്ങളെ വലയിലാക്കിയത് ഇങ്ങനെ
ദുബായ്: മോഡലിങ്, സ്റ്റേജ് ഷോ, ഇവന്റ് മാനേജ്മെന്റ് ജോലികൾ വാഗ്ദാനം ചെയ്ത് മലയാളി യുവതികളെ ദുബായിലെത്തിച്ച് ലൈംഗിക ചൂഷണത്തിന് ഇരയാക്കിയെന്ന ആരോപണവുമായി ബന്ധപ്പെട്ട കേസിൽ കൂടുതൽ ഞെട്ടിക്കുന്ന വിവരങ്ങൾ പുറത്ത്. മോഡൽ അലീന ഏബ്രഹാം ഉൾപ്പെടെ മൂന്ന് സ്ത്രീകൾ അറസ്റ്റിലായതോടെയാണ് അന്താരാഷ്ട്ര മനുഷ്യക്കടത്ത് ശൃംഖലയെക്കുറിച്ചുള്ള വിവരങ്ങൾ അന്വേഷണസംഘത്തിന് ലഭിച്ചത്.
തിരുവനന്തപുരം സ്വദേശിനിയായ അലീന, പെരുമ്പാവൂർ സ്വദേശിനിയും ദുബായിൽ ഇവന്റ് മാനേജ്മെന്റ് സ്ഥാപനം നടത്തുന്ന സ്റ്റോയ്സി (സിന്ധു), പൊന്നാനി സ്വദേശിനി മഞ്ജിമ എന്നിവരെയാണ് പൊലീസ് അറസ്റ്റ് ചെയ്തത്. കേസിൽ മറ്റ് രണ്ട് മലയാളി സ്ത്രീകളെയും പ്രതികളായി ഉൾപ്പെടുത്തിയിട്ടുണ്ട്.
കൊച്ചിയിലെ മോഡലിങ് മേഖലയിലും സിനിമ–സീരിയൽ സ്വപ്നങ്ങളുമായി എത്തുന്ന പുതുമുഖങ്ങളിലുമായിരുന്നു സംഘത്തിന്റെ പ്രധാന ശ്രദ്ധയെന്ന് പൊലീസ് കണ്ടെത്തി. ഉയർന്ന ശമ്പളമുള്ള ജോലികൾ വാഗ്ദാനം ചെയ്ത് സന്ദർശക വീസയിൽ ദുബായിലെത്തിച്ച ശേഷം പലരെയും നിർബന്ധിത ചൂഷണത്തിനിരയാക്കിയെന്നാണ് അന്വേഷണസംഘത്തിന്റെ നിഗമനം.
സ്റ്റേജ് ഷോകൾ, ഫാഷൻ ഇവന്റുകൾ, ബ്യൂട്ടി പാർലർ ജോലികൾ, ആർട്ടിസ്റ്റ് വീസ തുടങ്ങിയ വാഗ്ദാനങ്ങളാണ് സംഘങ്ങൾ കൂടുതലായും ഉപയോഗിച്ചിരുന്നത്. ദുബായിലെ ചില ഫ്ലാറ്റുകളിൽ യുവതികളെ പാർപ്പിച്ച് ഫോൺ പോലും നൽകാതെ നിയന്ത്രണത്തിൽ വെച്ചിരുന്നതായും വിവരമുണ്ട്.
നിലവിലെ കേസിൽ ഒന്നാം പ്രതിയായ സ്റ്റോയ്സിയുടെ ഇവന്റ് മാനേജ്മെന്റ് സ്ഥാപനത്തിന്റെ മറവിലായിരുന്നു റിക്രൂട്ട്മെന്റ് നടന്നതെന്നാണ് പൊലീസ് പറയുന്നത്. കൊച്ചിയിലെ മോഡലിങ് രംഗത്ത് സജീവമായിരുന്ന അലീന, പുതുമുഖങ്ങളെ സംഘത്തിലേക്ക് എത്തിക്കുന്നതിൽ പ്രധാന പങ്കുവഹിച്ചതായും കണ്ടെത്തിയിട്ടുണ്ട്.
ദുബായിലെ ചില മാഫിയാ സംഘങ്ങളുമായി പ്രതികൾക്ക് ബന്ധമുണ്ടെന്ന വിവരത്തെ തുടർന്ന് അന്വേഷണം വ്യാപിപ്പിച്ചിട്ടുണ്ട്. ഒളിവിലുള്ള രണ്ട് മലയാളി സ്ത്രീകൾക്കായി ലുക്കൗട്ട് നോട്ടീസും പുറപ്പെടുവിച്ചു.
ഗൾഫ് രാജ്യങ്ങളിലേക്ക് ജോലി തേടി പോകുന്നവർ വീസ, സ്പോൺസർ, സ്ഥാപനങ്ങളുടെ വിശ്വാസ്യത എന്നിവ നിർബന്ധമായും പരിശോധിക്കണമെന്ന് പൊലീസ് മുന്നറിയിപ്പ് നൽകി.
English Summary
A major human trafficking racket targeting Malayali women with fake modelling and event management job offers in Dubai has come under investigation after the arrest of three women, including model Aleena Abraham. Police say young women were lured to the UAE with promises of high-paying jobs and later subjected to exploitation.
dubai-human-trafficking-racket-targeting-malayali-women-under-probe
Dubai, Human Trafficking, Malayali Women, Kerala Crime, Dubai Crime, Modelling Scam, Aleena Abraham, UAE News, Kerala Police, Exploitation Case
