കാമുകനൊപ്പം പോകണം! നൂറടി ഉയരമുള്ള മൊബൈൽ ടവറിൽ കയറി വിവാഹിതയുടെ പ്രതിഷേധം
ഹത്രാസ് (ഉത്തർപ്രദേശ്): കാമുകനൊപ്പം ജീവിക്കാൻ അനുവദിക്കണമെന്ന ആവശ്യവുമായി വിവാഹിതയായ യുവതി നൂറടി ഉയരമുള്ള മൊബൈൽ ടവറിൽ കയറി പ്രതിഷേധിച്ചു. സസ്നി പൊലീസ് സ്റ്റേഷൻ പരിധിയിലെ ലുറ്റ്സൻ റോഡിലാണ് സംഭവം.
പൂജ (30) എന്ന യുവതിയാണ് ടവറിൽ കയറി പരിഭ്രാന്തി സൃഷ്ടിച്ചത്. വിവരം ലഭിച്ചതോടെ പൊലീസ്, അഗ്നിരക്ഷാസേന എന്നിവർ സ്ഥലത്തെത്തി രക്ഷാപ്രവർത്തനം നടത്തി. ഏറെ പരിശ്രമത്തിനൊടുവിൽ യുവതിയെ സുരക്ഷിതമായി താഴെയിറക്കി.
ഭർത്താവിനും കുടുംബത്തിനുമൊപ്പമാണ് യുവതി ഇതുവരെ താമസിച്ചിരുന്നത്. എന്നാൽ ദാമ്പത്യജീവിതത്തിൽ സന്തോഷമില്ലായ്മയുണ്ടെന്ന് പ്രാഥമിക അന്വേഷണത്തിൽ കണ്ടെത്തിയതായി പൊലീസ് അറിയിച്ചു. സ്വന്തം വീട്ടിലേക്ക് പോകുന്നതിനിടെ വഴിമധ്യേ ഇറങ്ങി ടവറിൽ കയറുകയായിരുന്നു.
സംഭവത്തിന് പിന്നാലെ യുവതിയെ പൊലീസ് സ്റ്റേഷനിലേക്ക് മാറ്റി. കൗൺസിലിംഗ് നൽകുന്നതിനുള്ള നടപടികൾ ആരംഭിച്ചിട്ടുണ്ടെന്നും, ഭർത്താവിനെയും ബന്ധുക്കളെയും വിളിച്ചുവരുത്തിയിട്ടുണ്ടെന്നും ഉദ്യോഗസ്ഥർ വ്യക്തമാക്കി.
English Summary
A married woman in Hathras, Uttar Pradesh, climbed a mobile tower demanding to live with her lover. Police and fire force rescued her safely. She was later taken for counseling as authorities cited marital distress.
