ബംഗാളിൽ മുഴുവൻ സീറ്റിലും കോൺഗ്രസ്; മമതയ്ക്കെതിരെയും സ്ഥാനാർത്ഥി
ഡൽഹി: പശ്ചിമ ബംഗാൾ നിയമസഭാ തെരഞ്ഞെടുപ്പിൽ 294 സീറ്റുകളിലും മത്സരിക്കുമെന്ന് ഇന്ത്യൻ നാഷണൽ കോൺഗ്രസ് പ്രഖ്യാപിച്ചു.
മുഖ്യമന്ത്രി മമത ബാനർജി മത്സരിക്കുന്ന ഭവാനിപൂരിലും സ്ഥാനാർത്ഥിയെ നിർത്തുമെന്നും പാർട്ടി വ്യക്തമാക്കി.
‘ഒരു സീറ്റും ഒഴിച്ചിടില്ല’
പാർട്ടിയുടെ കേന്ദ്ര തെരഞ്ഞെടുപ്പ് കമ്മിറ്റി യോഗത്തിന് ശേഷമാണ് തീരുമാനം പുറത്തുവന്നത്. പശ്ചിമ ബംഗാളിന്റെ ചുമതലയുള്ള എഐസിസി നേതാവ് ഗുലാം അഹമ്മദ് മിർ എല്ലാ മണ്ഡലങ്ങളിലും സ്ഥാനാർത്ഥികളെ നിർത്തുമെന്നും ഒരു സീറ്റും ഒഴിച്ചിടില്ലെന്നും അറിയിച്ചു.
ഭവാനിപൂരിൽ നേരിട്ടുള്ള പോരാട്ടം
മുഖ്യമന്ത്രി മമത ബാനർജി മത്സരിക്കുന്ന ഭവാനിപൂരിൽ കോൺഗ്രസ് ശക്തമായ സ്ഥാനാർത്ഥിയെ ഇറക്കുമെന്ന് നേതൃത്വം വ്യക്തമാക്കി.
അവിടെ മത്സരിക്കുന്ന സ്ഥാനാർത്ഥി പാർട്ടിയുടെ പ്രധാന നേതാവായിരിക്കുമെന്നും സൂചന നൽകി.
ഭാര്യയുമായുള്ള ശാരീരിക ബന്ധം ബലാത്സംഗമല്ല;ഭർത്താവിനെതിരെയുള്ള പീഡനക്കേസ് റദ്ദാക്കി ഹൈക്കോടതി!
ഉന്നതതല ചർച്ചകൾക്ക് പിന്നാലെ തീരുമാനം
ഡൽഹിയിൽ നടന്ന യോഗത്തിൽ കോൺഗ്രസ് അധ്യക്ഷൻ മല്ലികാർജുൻ ഖാർഗെ, മുൻ അധ്യക്ഷൻ രാഹുൽ ഗാന്ധി, എഐസിസി ജനറൽ സെക്രട്ടറി കെ. സി. വേണുഗോപാൽ എന്നിവരും പങ്കെടുത്തു.
സ്ഥാനാർഥി നിർണയവുമായി ബന്ധപ്പെട്ട് വിശദമായ ചർച്ചകൾ നടത്തി.
തിരഞ്ഞെടുപ്പ് ഷെഡ്യൂൾ; ശക്തമായ മത്സര സൂചന
പശ്ചിമ ബംഗാളിൽ ഏപ്രിൽ 23-നും 29-നും രണ്ട് ഘട്ടങ്ങളിലായി വോട്ടെടുപ്പ് നടക്കും. വോട്ടെണ്ണൽ മെയ് 4-ന് നടക്കും.
എല്ലാ സീറ്റുകളിലും മത്സരിക്കാനുള്ള കോൺഗ്രസിന്റെ തീരുമാനം സംസ്ഥാന രാഷ്ട്രീയത്തിൽ കടുത്ത മത്സരത്തിനുള്ള സൂചനയായി വിലയിരുത്തപ്പെടുന്നു.
