കണ്ടാൽ മാറിപ്പോകും! ഒരു വയസ്സുകാരൻ മുതൽ മുപ്പതുകാരൻ വരെ; വിദേശത്തുനിന്നുൾപ്പെടെ 300 ട്രിപ്ലെറ്റുകൾ കൊച്ചിയിൽ ഒത്തുചേർന്നപ്പോൾ
കൊച്ചി: ഒറ്റ പ്രസവത്തിൽ ജനിച്ച സഹോദരങ്ങളായ ട്രിപ്ലെറ്റുകളുടെ അപൂർവ സംഗമത്തിന് കൊച്ചി വേദിയായി. ഒരു വയസുമുതൽ മുപ്പത് വയസുവരെയുള്ള 300 ട്രിപ്ലെറ്റ് സംഘങ്ങളാണ് സംഗമത്തിൽ പങ്കെടുത്തത്.
വിദേശ രാജ്യങ്ങളിൽ നിന്നുമടക്കം നിരവധി കുടുംബങ്ങൾ പങ്കുചേർന്ന ഈ സംഗമം കൊച്ചിയിലെ ഹയാത്ത് ഹോട്ടലിൽ സംഘടിപ്പിച്ചത് എടപ്പാൾ ഹോസ്പിറ്റൽ ഗ്രൂപ്പാണ്.
എടപ്പാൾ, തൃശൂർ, കൊച്ചി എന്നിവിടങ്ങളിലെ ആശുപത്രികളിൽ 1996 മുതൽ 2026 വരെയുള്ള കാലയളവിൽ ജനിച്ച ട്രിപ്ലെറ്റുകളെയാണ് പ്രത്യേകമായി കണ്ടെത്തി സംഗമത്തിലേക്ക് ക്ഷണിച്ചത്.
എടപ്പാൾ ഹോസ്പിറ്റൽ ഗ്രൂപ്പ് ചെയർമാൻ ഡോ. കെ.കെ. ഗോപിനാഥൻ നേരിട്ടാണ് കുടുംബങ്ങളുമായി ബന്ധപ്പെട്ടു പരിപാടിയിലേക്ക് ക്ഷണിച്ചതെന്ന് അധികൃതർ അറിയിച്ചു.
സംഗമം പുതിയ സൗഹൃദങ്ങൾക്കും വഴിതുറന്നു. പങ്കെടുത്ത കുടുംബങ്ങൾ വാട്സ്ആപ്പ് ഗ്രൂപ്പുകൾ രൂപീകരിക്കുകയും ഓർമ്മചിത്രങ്ങൾ പകർത്തുകയും ചെയ്തു.
ഈ ആശുപത്രികളിൽ മൂവായിരത്തിലധികം ഇരട്ടക്കുട്ടികളും ജനിച്ചിട്ടുണ്ടെന്ന് ഡോ. കെ.കെ. ഗോപിനാഥൻ വ്യക്തമാക്കി.
ഹൈബി ഈഡൻ എം.പി, ആരോഗ്യ സർവകലാശാല വൈസ് ചാൻസലർ ഡോ. മോഹനൻ കുന്നുമ്മൽ എന്നിവർ ചേർന്നാണ് പരിപാടി ഉദ്ഘാടനം ചെയ്തത്.
നടൻ കുഞ്ചാക്കോ ബോബൻ, നടി ജ്യോതിർമയി, വിവിധ മെഡിക്കൽ രംഗങ്ങളിലെ പ്രമുഖർ, ആശുപത്രി അധികൃതർ എന്നിവർ ചടങ്ങിൽ പങ്കെടുത്തു.
കാഴ്ചപരിമിതിയുള്ള കലാകാരന്മാർ അവതരിപ്പിച്ച വാദ്യസംഗീതത്തോടെയായിരുന്നു പരിപാടിയുടെ തുടക്കം.
ട്രിപ്ലെറ്റ് സംഗമത്തിന് ഏഷ്യ ബുക്ക് ഓഫ് റെക്കോർഡ്സിന്റെയും ഇന്ത്യ ബുക്ക് ഓഫ് റെക്കോർഡ്സിന്റെയും അംഗീകാര സർട്ടിഫിക്കറ്റ് ഡോ. കെ.കെ. ഗോപിനാഥൻ ഏറ്റുവാങ്ങി.
English Summary
An extraordinary gathering of 300 triplet sibling groups was held in Kochi, bringing together families from across India and abroad. Organized by Edappal Hospital Group, the event earned recognition from the Asia and India Book of Records.
kochi-triplets-meet-300-groups-record-event
കൊച്ചി, ട്രിപ്ലെറ്റ് സംഗമം, എടപ്പാൾ ഹോസ്പിറ്റൽ, അപൂർവ സംഗമം, റെക്കോർഡ് നേട്ടം, ഹൈബി ഈഡൻ, കുഞ്ചാക്കോ ബോബൻ, കേരള വാർത്ത, കുടുംബ സംഗമം, ഇന്ത്യ ബുക്ക് ഓഫ് റെക്കോർഡ്സ്
