“ഗ്യാസ് ക്ഷാമത്തിൽ സർക്കാർ ഇടപെടൽ”; പുതിയ മുൻഗണന പട്ടിക പ്രഖ്യാപിച്ചു
തിരുവനന്തപുരം: സംസ്ഥാനത്തെ എൽ.പി.ജി സിലിണ്ടർ ക്ഷാമം രൂക്ഷമായ സാഹചര്യത്തിൽ, വിതരണ മുൻഗണന പട്ടിക പുനഃനിശ്ചയിച്ച് സർക്കാർ ഉത്തരവ് പുറത്തിറക്കി. മുഖ്യമന്ത്രിയുടെ അധ്യക്ഷതയിൽ എണ്ണക്കമ്പനികളുടെ പ്രതിനിധികൾ പങ്കെടുത്ത യോഗത്തിലാണ് നിർണായക തീരുമാനം എടുത്തത്.
പുതിയ ക്രമീകരണപ്രകാരം, അവശ്യസർവീസുകൾക്കായി പ്രതിദിനം 70.05 ടൺ എൽ.പി.ജി സിലിണ്ടറുകൾ നീക്കിവയ്ക്കും. ശേഷിക്കുന്ന 80.55 ടൺ വിവിധ ജില്ലകളിൽ ആവശ്യാനുസരണം വിതരണം ചെയ്യും.
ജില്ലകളിൽ കലക്ടർമാരുടെ നേതൃത്വത്തിലുള്ള സമിതികളും സംസ്ഥാനതലത്തിൽ ഭക്ഷ്യപൊതുവിതരണ വകുപ്പും സിവിൽ സപ്ലൈസ് കമ്മിഷണറും വിതരണത്തെ നിരീക്ഷിക്കും.
പശ്ചാത്തലം
സംസ്ഥാനത്ത് ഗ്യാസ് ക്ഷാമം ശക്തമായതോടെ ഹോട്ടൽ മേഖലയും സാധാരണ ഉപഭോക്താക്കളും വലിയ പ്രതിസന്ധി നേരിടുകയാണ്.
ഇതിന്റെ പശ്ചാത്തലത്തിൽ മുൻഗണന പട്ടികയിൽ മാറ്റം വരുത്തേണ്ടതുണ്ടെന്ന ആവശ്യം ശക്തമായിരുന്നു. അതിനെ തുടർന്നാണ് സർക്കാർ അടിയന്തരമായി ഇടപെട്ടത്.
പുതിയ മുൻഗണന പട്ടിക
പുതുതായി അങ്കണവാടികളും പോഷകാഹാര കേന്ദ്രങ്ങളും ഗ്യാസ് ഉപയോഗിക്കുന്ന ശ്മശാനങ്ങളും ഉൾപ്പെടുത്തി. മുൻഗണന ക്രമം ഇങ്ങനെ:
സർക്കാർ ആശുപത്രികൾ, മെഡിക്കൽ കോളേജുകൾ, പ്രാഥമികാരോഗ്യ കേന്ദ്രങ്ങൾ
അത്യാഹിത-അടിയന്തര ചികിത്സ നൽകുന്ന സ്വകാര്യ ആശുപത്രികൾ
വിദ്യാഭ്യാസ സ്ഥാപനങ്ങൾ, എസ്.സി/എസ്.ടി ഹോസ്റ്റലുകൾ ഉൾപ്പെടെ
സർക്കാർ-തദ്ദേശസ്ഥാപനങ്ങളുടെ കമ്മ്യൂണിറ്റി കിച്ചണുകൾ
അങ്കണവാടികളും പോഷകാഹാര കേന്ദ്രങ്ങളും
ദുരിതാശ്വാസ ക്യാംപുകളും അടിയന്തര ഷെൽറ്ററുകളും
അഭയകേന്ദ്രങ്ങൾ, വൃദ്ധസദനങ്ങൾ, അനാഥാലയങ്ങൾ
സർക്കാർ സ്ഥാപനങ്ങളും ഐ.ടി പാർക്കുകളും വ്യവസായ സ്ഥാപനങ്ങളുടെയും കാന്റീനുകൾ
പൊതുശ്മശാനങ്ങൾ
ശക്തമായ നിരീക്ഷണം
സംസ്ഥാനതലത്തിൽ ചീഫ് സെക്രട്ടറി അധ്യക്ഷനായ പ്രതിസന്ധി നിരീക്ഷണ സമിതിയും രൂപീകരിച്ചിട്ടുണ്ട്. വിവിധ വകുപ്പുകളുടെ സെക്രട്ടറിമാരും ഡി.ജി.പി യും എണ്ണക്കമ്പനി പ്രതിനിധികളും അംഗങ്ങളായ സമിതി വിതരണം വിലയിരുത്തും.
English Summary
The Kerala government has revised the LPG cylinder distribution priority list amid an ongoing shortage.
