വിവാഹം കഴിച്ച് കൊണ്ടുപോകാമെന്ന് ‘മസ്കിന്റെ വാ​ഗ്ദാനം’;  നഷ്ടമായത് 16 ലക്ഷം രൂപ

വിവാഹം കഴിച്ച് കൊണ്ടുപോകാമെന്ന് ‘മസ്കിന്റെ വാ​ഗ്ദാനം’;  നഷ്ടമായത് 16 ലക്ഷം രൂപ

മുംബൈ: ഇലോൺ മസ്കിന്റെ പേരിൽ സൈബർ തട്ടിപ്പ്; മുംബൈ സ്വദേശിനിയിൽ നിന്ന് 16 ലക്ഷം രൂപ തട്ടിയെടുത്തു

ശതകോടീശ്വരൻ ഇലോൺ മസ്കിന്റെ പേരിൽ സൈബർ തട്ടിപ്പ് നടത്തിയതായി പരാതി. 

സോഷ്യൽ മീഡിയയിലൂടെ ഇലോൺ മസ്ക് എന്ന പേരിൽ പരിചയപ്പെട്ട വ്യക്തി മുംബൈ സ്വദേശിനിയായ യുവതിയിൽ നിന്ന് 16 ലക്ഷം രൂപ തട്ടിയെടുത്തതായാണ് പരാതി. ഇൻഷുറൻസ് കമ്പനിയിലെ ഉദ്യോഗസ്ഥയായ നാൽപ്പതുകാരിയാണ് തട്ടിപ്പിനിരയായത്.

സോഷ്യൽ മീഡിയയിലൂടെയാണ് തട്ടിപ്പുകാരൻ യുവതിയുമായി ബന്ധം സ്ഥാപിച്ചത്. താൻ ഇലോൺ മസ്ക് ആണെന്നും വിവാഹം കഴിച്ച് യുഎസിലേക്ക് കൊണ്ടുപോകുമെന്നും വിശ്വസിപ്പിച്ചാണ് ഇയാൾ യുവതിയുടെ വിശ്വാസം നേടിയെടുത്തത്. 

തുടർന്ന് വീസ നടപടികൾ എളുപ്പമാക്കാൻ സഹായിക്കുമെന്ന പേരിൽ ‘ജെയിംസ്’ എന്ന മറ്റൊരു വ്യക്തിയെ യുവതിക്ക് പരിചയപ്പെടുത്തി.

വീസ പ്രക്രിയ വേഗത്തിലാക്കണമെന്ന വ്യാജേന ആമസോൺ ഗിഫ്റ്റ് കാർഡുകൾ വാങ്ങി അവയുടെ കോഡുകൾ അയയ്ക്കണമെന്ന് ജെയിംസ് ആവശ്യപ്പെട്ടു.

 ഇതനുസരിച്ച് കഴിഞ്ഞ ഒക്ടോബർ മുതൽ ഈ മാസം വരെ യുവതി 16.34 ലക്ഷം രൂപയുടെ ഗിഫ്റ്റ് കാർഡുകൾ വാങ്ങി കൈമാറിയതായി പൊലീസ് പറഞ്ഞു.

തുടർന്ന് യുഎസ് യാത്രയ്ക്കുള്ള വിമാന ടിക്കറ്റ് ബുക്ക് ചെയ്യാനായി രണ്ട് ലക്ഷം രൂപ കൂടി ആവശ്യപ്പെട്ടതോടെയാണ് യുവതിക്ക് സംശയം തോന്നിയത്. 

മാതാപിതാക്കളെ വിവരം അറിയിച്ച ശേഷം യുവതി പൊലീസിൽ പരാതി നൽകി. പരാതിയുടെ അടിസ്ഥാനത്തിൽ സൈബർ പൊലീസ് അന്വേഷണം ആരംഭിച്ചിട്ടുണ്ട്.

English Summary:

A Mumbai-based woman was cheated of over ₹16 lakh in a cyber fraud where a scammer impersonated billionaire Elon Musk on social media. The fraudster promised marriage and relocation to the US, introduced an accomplice claiming to assist with visa procedures, and convinced the victim to buy Amazon gift cards. Suspicion arose when additional money was demanded for flight tickets, following which a complaint was filed and cyber police launched an investigation.

elon-musk-impersonation-cyber-fraud-mumbai

cyber fraud, Elon Musk impersonation, Mumbai news, online scam, social media fraud, cyber crime investigation