മലപ്പുറം: പക്ഷിനിരീക്ഷകരെ ആവേശംകൊള്ളിച്ച്‌ അപൂർവ ദേശാടകൻ ജില്ലയിൽ. സ്‌പെയിൻ, തുർക്കി, കിർഗിസ്താൻ, മംഗോളിയ തുടങ്ങിയയിടങ്ങളിൽ പ്രജനനകാലം ചെലവഴിച്ച്‌ ആഫ്രിക്കയിലേക്ക്‌ ദേശാടനം നടത്തുന്ന ചെമ്പുവാലൻ പാറക്കിളിയെ വാഴയൂരിൽ കണ്ടെത്തി. ഇതാദ്യമായാണ്‌ ജില്ലയിൽ ഈയിനം പക്ഷിയുടെ സാന്നിധ്യം സ്ഥിരീകരിക്കുന്നത്‌.Rufous-tailed Rock-Thrush found in Vazhayur
തെക്കൻ യൂറോപ്പുമുതൽ മംഗോളിയവരെ നീണ്ടുകിടക്കുന്നതാണ്‌ ഇവയുടെ പ്രജനന കേന്ദ്രങ്ങൾ. ഓഗസ്റ്റ്‌-നവംബർ മാസത്തോടെ ഇവിടങ്ങളിൽനിന്നു തുടങ്ങുന്ന ദേശാടനം സാധാരണ ചെങ്കടൽവഴി ആഫ്രിക്കവരെ നീളും.
ഇക്കാലങ്ങളിൽ ഇന്ത്യയിൽ ലഡാക്കിലും ജമ്മു-കശ്‌മീരിലും ഇവയെ കാണാറുണ്ട്‌. എന്നാൽ, സാധാരണ ദേശാടനപാതയിലൊന്നും കേരളം ഉൾപ്പെടുന്നില്ല. അതുകൊണ്ടുതന്നെ ഇവ കേരളത്തിൽ സാധാരണ വന്നെത്താറില്ല.
പക്ഷിനിരീക്ഷകരുടെ സാമൂഹികമാധ്യമമായ ഇ-ബേർഡിന്റെ അടിസ്ഥാനത്തിൽ 2015-ൽ ആലപ്പുഴയിലാണ്‌ ഈയിനം പക്ഷിയെ ആദ്യം കണ്ടെത്തുന്നത്‌. ഇതിനുശേഷം കേരളത്തിൽ വന്നെത്തിയതായി റിപ്പോർട്ടുകളില്ല.
കോഴിക്കോട് മെഡിക്കൽകോളേജ് മാതൃശിശു സംരക്ഷണ കേന്ദ്രത്തിലെ സീനിയർ നഴ്സിങ് ഓഫീസറും വന്യജീവി ഫോട്ടോഗ്രാഫറുമായ ടി.കെ. മുഹമ്മദ് ഷമീർ കൊടിയത്തൂരാണ് കഴിഞ്ഞദിവസം വാഴയൂർ മലയിൽനിന്ന് ഈ ദേശാടകന്റെ ചിത്രം പകർത്തിയത്‌.
