53 വർഷങ്ങൾക്ക് ശേഷം വീണ്ടും ‘ബ്ലൂ മാർബിൾ’ പോലൊരു കാഴ്ച; ചന്ദ്രയാത്രയ്ക്കിടെ ഭൂമിയുടെ അപൂർവ്വ ചിത്രം പുറത്തുവിട്ട് നാസ!
ചന്ദ്രനിലേക്കുള്ള യാത്രയ്ക്കിടെ ആർട്ടെമിസ് II സംഘമാണ് ഭൂമിയുടെ അപൂർവ്വ ചിത്രം പകർത്തിയത്. 53 വർഷങ്ങൾക്ക് ശേഷമാണ് ഇത്തരത്തിലുള്ള ദൃശ്യങ്ങൾ വീണ്ടും ലഭ്യമാകുന്നത്. നാസയാണ് ചിത്രം പുറത്തുവിട്ടത്.
1972ൽ അപ്പോളോ 17 ദൗത്യത്തിനിടെ ഹാരിസൺ ഷ്മിറ്റ് പകർത്തിയ ‘ബ്ലൂ മാർബിൾ’ ചിത്രം ലോകപ്രശസ്തമായിരുന്നു. അതിനെ ഓർമ്മിപ്പിക്കുന്ന തരത്തിലാണ് പുതിയ ചിത്രം പുറത്തുവന്നിരിക്കുന്നത്.
നാല് ബഹിരാകാശയാത്രികരുമായി സ്പേസ് ലോഞ്ച് സിസ്റ്റം റോക്കറ്റ് ഫ്ലോറിഡയിലെ കെനഡി സ്പേസ് സെന്ററിൽ നിന്ന് അടുത്തിടെ വിക്ഷേപിച്ചിരുന്നു. എസ്എൽഎസ് റോക്കറ്റിലെ ഒറിയൺ ബഹിരാകാശവാഹനത്തിലൂടെയാണ് സംഘം ചന്ദ്രനിലേക്കുള്ള യാത്ര തുടരുന്നത്.
മിഷൻ കമാൻഡറായി റീഡ് വൈസ്മാൻ, മിഷൻ പൈലറ്റായി വിക്ടർ ഗ്ലോവർ, മിഷൻ സ്പെഷ്യലിസ്റ്റുകളായി ക്രിസ്റ്റിന കോച്ച്, ജെറമി ഹാൻസൻ എന്നിവരാണ് സംഘത്തിലുള്ളത്.
English Summary
NASA has released a rare Earth image captured by the Artemis II crew, reminiscent of the iconic “Blue Marble” photo taken during Apollo 17 in 1972.
