ഡബ്ലിൻ: അയർലൻഡിൽ മലയാളി നഴ്സ് അന്തരിച്ചു. കൗണ്ടി ടിപ്പററിയിലെ നീന സെൻറ് കളൻസ് കമ്മ്യൂണിറ്റി നഴ്സിങ് യൂണിറ്റിലെ സ്റ്റാഫ് നഴ്സായ സീമ മാത്യു (45) ആണ് അന്തരിച്ചത്.
കഴിഞ്ഞ കുറച്ചു നാളുകളായി ചികിത്സയിൽ കഴിയവെ കഴിഞ്ഞ ദിവസം രാവിലെ 11 മണിയോടെ വീട്ടിൽ വച്ചായിരുന്നു അന്ത്യം.
തൊടുപുഴ കല്ലൂർക്കാട് വട്ടക്കുഴി മാത്യു, മേരി ദമ്പതികളുടെ മകളാണ് സീമ മാത്യു. മകളുടെ അസുഖ വിവരമറിഞ്ഞു ഇരുവരും അയർലൻഡിലേക്ക് യാത്ര തിരിക്കാനുള്ള ഒരുക്കത്തിലായിരുന്നു.
തൊടുപുഴ ചിലവ് പുളിയന്താനത്ത് ജെയ്സൺ ജോസാണ് ഭർത്താവ്. മക്കൾ: ജെഫിൻ, ജുവൽ, ജെറോം. വർഷങ്ങളായി അയർലൻഡിലാണ് സീമയും കുടുംബവും താമസിക്കുന്നത്.
പ്രദേശത്തെ സാമൂഹിക പ്രവർത്തനങ്ങളിലും കുടുംബം സജീവമായിരുന്നു. 18 ന് രാവിലെ 11 മുതൽ 1.30 വരെ നീനാ കേള്ളേഴ്സ് ഫ്യൂണറൽ ഹോമിൽ (E45X094) സീമയ്ക്ക് അന്തിമോപചാരം അർപ്പിക്കാനുള്ള സൗകര്യമുണ്ടായിരിക്കും.
തുടർന്ന് ഉച്ചയ്ക്ക് രണ്ടുമണിക്ക് നീനാ സെൻറ് മേരീസ് റോസറി ചർച്ചിൽ (E45YH29) വച്ച് സിറോ മലബാർ ക്രമത്തിലുള്ള ശുശ്രൂഷകളും സംസ്കാരവും നടത്തപ്പെടും. സീമയുടെ നിര്യാണത്തിൽ അയർലൻഡിലെ വിവിധ മലയാളി സംഘടനകൾ അനുശോചനം അറിയിച്ചു.
