മലപ്പുറം: നിലമ്പൂർ വനംവകുപ്പ് ഓഫീസ് അടിച്ചു തകർത്ത സംഭവത്തിൽ പി വി അൻവർ എംഎൽഎയെ അറസ്റ്റ് ചെയ്ത് പോലീസ്. നിലമ്പൂർ പൊലീസ് എടുത്ത കേസിലാണ് നടപടി. അറസ്റ്റ് രാഷ്ട്രീയ ഗൂഢാലോചനയുടെ ഭാഗമാണെന്ന് പിവി അൻവർ പ്രതികരിച്ചു.(Forest office attack case; P V Anwar MLA arrested)
തനിക്കെതിരായ നീക്കത്തിനു പിന്നില് മുഖ്യമന്ത്രി പിണറായി വിജയനും പി ശശിയുമാണെന്നും അന്വര് ആരോപിച്ചു. അൻവറടക്കം 11 പേർക്കെതിരെയാണ് കേസെടുത്തിരിക്കുന്നത്. ഒന്നാം പ്രതി അൻവറായ കേസിൽ നേരത്തെ നാല് ഡിഎംകെ പ്രവർത്തകരെ പൊലീസ് അറസ്റ്റ് ചെയ്തിരുന്നു. കൃത്യനിർവഹണം തടയൽ, പൊതുമുതൽ നശിപ്പിക്കൽ അടക്കമുള്ള വകുപ്പുകൾ ചുമത്തിയാണ് കേസെടുത്തത്. പൊലീസ് ഉദ്യോഗസ്ഥനെ മർദ്ദിച്ചുവെന്നും അൻവറിനെതിരെ എഫ്ഐആറിൽ പറയുന്നുണ്ട്.
മലപ്പുറത്ത് കാട്ടാനയാക്രമണത്തിൽ യുവാവ് മരിച്ചതിൽ പ്രതിഷേധിച്ചായിരുന്നു അൻവറിന്റെ പാർട്ടിയായ ഡിഎംകെ പ്രവർത്തകർ വനംവകുപ്പ് ഓഫീസിലേക്ക് അതിക്രമിച്ചു കയറി ആക്രമണം നടത്തിയത്.
