ജോർജുകുട്ടിയുടെ മടക്കയാത്ര; ‘ദൃശ്യം 3’ പ്രീമിയർ വിദേശത്ത്; നൂറു കോടി ക്ലബ്ബിൽ കളി തുടങ്ങാൻ ജീത്തു ജോസഫും സംഘവും
കൊച്ചി: മലയാള സിനിമയിലെ ഏറ്റവും ശ്രദ്ധേയമായ ഫ്രാഞ്ചൈസികളിലൊന്നായ ‘ദൃശ്യം’ ഇനി മൂന്നാം ഭാഗവുമായി വീണ്ടും പ്രേക്ഷകരിലേക്ക് എത്തുന്നു. മെയ് 21ന് ലോകമെമ്പാടുമായി റിലീസിനൊരുങ്ങുന്ന ‘ദൃശ്യം 3’യുടെ ആദ്യ പ്രദർശനം കേരളത്തിൽ അല്ലെന്ന റിപ്പോർട്ടുകളാണ് ഇപ്പോൾ ശ്രദ്ധ നേടുന്നത്.
ലഭ്യമായ വിവരങ്ങൾ പ്രകാരം, മെയ് 20ന് അമേരിക്കയിൽ വൈകിട്ട് 7.30ന് ചിത്രത്തിന്റെ വേൾഡ് പ്രീമിയർ സംഘടിപ്പിക്കും. ഇതോടെ മലയാള സിനിമയുടെ ചരിത്രത്തിൽ തന്നെ വലിയ ആഗോള റിലീസ് തുടക്കങ്ങളിലൊന്നായി ‘ദൃശ്യം 3’ മാറുമെന്നാണ് വിലയിരുത്തൽ.
സ്വന്തം കുടുംബത്തെ രക്ഷിക്കാൻ എന്തും ചെയ്യാൻ തയ്യാറാകുന്ന ജോർജ്കുട്ടിയെന്ന സാധാരണ മനുഷ്യന്റെ അസാധാരണ ജീവിത പോരാട്ടമാണ് ‘ദൃശ്യം’ പരമ്പരയുടെ അടിത്തറ. മൂന്നാം ഭാഗത്തിലും അതേ തീവ്രതയോടെയും കൂടുതൽ വികാര ആഴത്തോടെയും കഥ മുന്നോട്ടുപോകുമെന്ന സൂചനകളാണ് പുറത്തുവരുന്നത്.
കാലത്തിന്റെ മാറ്റങ്ങൾ കഥാപാത്രങ്ങളുടെ ജീവിതത്തിലും സ്വഭാവത്തിലും എങ്ങനെ സ്വാധീനം ചെലുത്തുന്നു എന്നതും പുതിയ ഭാഗത്തിൽ പ്രധാനമായി അവതരിപ്പിക്കപ്പെടുമെന്നാണ് റിപ്പോർട്ട്. സംവിധായകൻ ജീത്തു ജോസഫ് വീണ്ടും തിരക്കഥയും സംവിധാനവും കൈകാര്യം ചെയ്യുന്നു.
ചിത്രത്തിന്റെ വലിയ വിപണിമൂല്യം കണക്കിലെടുത്ത് ബോളിവുഡിലെ പ്രമുഖ സ്റ്റുഡിയോകളും ഇത്തവണ പദ്ധതിയുടെ ഭാഗമായിട്ടുണ്ട്. ഹിന്ദി ‘ദൃശ്യം’ പതിപ്പിന്റെ നിർമ്മാതാക്കളായ പനോരമ സ്റ്റുഡിയോസ് മലയാളം ‘ദൃശ്യം 3’യുടെ ആഗോള തിയറ്റർ, ഡിജിറ്റൽ അവകാശങ്ങൾ സ്വന്തമാക്കിയതായി നേരത്തെ റിപ്പോർട്ടുകൾ വന്നിരുന്നു. കൂടാതെ, പെൻ സ്റ്റുഡിയോസും പദ്ധതിയിൽ നിക്ഷേപവുമായി രംഗത്തുണ്ടെന്നാണ് വിവരം.
അതേസമയം, ചിത്രത്തെ കുറിച്ച് അമിത പ്രതീക്ഷകളില്ലാതെ കാണാൻ എത്തണമെന്ന അഭ്യർത്ഥന സംവിധായകൻ ജീത്തു ജോസഫ് പ്രേക്ഷകരോട് പങ്കുവെച്ചിട്ടുണ്ട്. ആദ്യ രണ്ട് ഭാഗങ്ങളുമായി താരതമ്യം ചെയ്യാതെ, മുൻവിധികളില്ലാതെ സിനിമ ആസ്വദിക്കുമ്പോഴാണ് മികച്ച അനുഭവം ലഭിക്കുകയെന്ന് അദ്ദേഹം വ്യക്തമാക്കി.
English Summary
Mohanlal’s much-awaited Drishyam 3 is set for a global premiere in the US on May 20 ahead of its worldwide release on May 21. Director Jeethu Joseph has asked audiences to watch the film without excessive expectations or comparisons to the earlier parts.
