എംഎൽഎമാരെ ഒറ്റയ്ക്ക് കാണണം! വേണുഗോപാലിന്റെ ആധിപത്യം തടയാൻ സതീശൻ പക്ഷം പുതിയ തന്ത്രം പുറത്തെടുക്കുന്നു

എംഎൽഎമാരെ ഒറ്റയ്ക്ക് കാണണം! വേണുഗോപാലിന്റെ ആധിപത്യം തടയാൻ സതീശൻ പക്ഷം പുതിയ തന്ത്രം പുറത്തെടുക്കുന്നു

തിരുവനന്തപുരം: കേരളത്തിലെ പുതിയ മുഖ്യമന്ത്രിയെ തിരഞ്ഞെടുക്കാനുള്ള കോൺഗ്രസിലെ ചർച്ചകൾ നിർണായക ഘട്ടത്തിലേക്ക് കടക്കുന്നതിനിടെ പാർട്ടിക്കുള്ളിലെ ഗ്രൂപ്പ് നീക്കങ്ങൾ ശക്തമാകുന്നു. നേതാക്കളുടെ ക്യാമ്പുകൾ സജീവമായി രംഗത്തെത്തിയതോടെ രാഷ്ട്രീയ കേന്ദ്രങ്ങളിൽ ആവേശവും അനിശ്ചിതത്വവും ഒരുപോലെ ഉയർന്നിരിക്കുകയാണ്.

മുഖ്യമന്ത്രി സ്ഥാനാർത്ഥിയെ കുറിച്ചുള്ള അന്തിമ തീരുമാനത്തിനായി എഐസിസി നിയോഗിച്ച നിരീക്ഷകർ കേരളത്തിലെത്താനിരിക്കെ, എംഎൽഎമാരെ പ്രത്യേകം പ്രത്യേകം കണ്ടു അഭിപ്രായം തേടണമെന്ന ആവശ്യവുമായി വി.ഡി. സതീശൻ പക്ഷം രംഗത്തെത്തി. കൂടിക്കാഴ്ചകളിൽ എഐസിസി ജനറൽ സെക്രട്ടറി ദീപാദാസ് മുൻഷി പങ്കെടുക്കരുതെന്ന ആവശ്യവും അവർ ഉന്നയിക്കുന്നുണ്ട്.

നാളെ രാവിലെ നടക്കുന്ന കോൺഗ്രസ് നിയമസഭാകക്ഷി യോഗം നിർണായകമാകും. 63 എംഎൽഎമാർ പങ്കെടുക്കുന്ന യോഗത്തിനൊപ്പമാണ് വ്യക്തിഗത അഭിപ്രായ ശേഖരണവും ആലോചിക്കുന്നത്. ഈ നീക്കത്തിന് പിന്നിൽ വ്യക്തമായ രാഷ്ട്രീയ തന്ത്രമുണ്ടെന്നാണ് വിലയിരുത്തൽ.

കെ.സി. വേണുഗോപാൽ പക്ഷം ഭൂരിപക്ഷ എംഎൽഎമാരുടെയും പിന്തുണ തങ്ങൾക്കുണ്ടെന്നാണ് അവകാശപ്പെടുന്നത്. കൂട്ടമായുള്ള ചർച്ചകളിൽ എംഎൽഎമാർ കെസിക്ക് അനുകൂലമായി പ്രതികരിക്കുമെന്ന ആത്മവിശ്വാസത്തിലാണ് അവരുടെ ക്യാമ്പ്.

അതേസമയം, വ്യക്തിഗത കൂടിക്കാഴ്ചകളിൽ എംഎൽഎമാരുടെ നിലപാട് മാറാൻ സാധ്യതയുണ്ടെന്നാണ് സതീശൻ പക്ഷത്തിന്റെ കണക്കുകൂട്ടൽ. ഇത്തരമൊരു സാഹചര്യത്തിൽ വി.ഡി. സതീശനെ പിന്തുണയ്ക്കുന്ന എംഎൽഎമാരുടെ എണ്ണം 30 വരെ ഉയരാമെന്നാണ് അവരുടെ പ്രതീക്ഷ.

ദീപാദാസ് മുൻഷിയുടെ സാന്നിധ്യം കെ.സി. വേണുഗോപാലിന് അനുകൂലമായ സ്വാധീനം ചെലുത്തുമെന്ന സംശയവും സതീശൻ പക്ഷം തുറന്നുപറയുന്നുണ്ട്. ഇതോടെ മുഖ്യമന്ത്രി തിരഞ്ഞെടുപ്പിന് മുന്നോടിയായുള്ള കോൺഗ്രസിലെ അണിയറ നീക്കങ്ങൾ കൂടുതൽ ചൂടുപിടിച്ചിരിക്കുകയാണ്.

English Summary

Factional moves within the Congress have intensified ahead of the Kerala chief minister selection. The V.D. Satheesan camp has demanded one-on-one meetings with MLAs and opposed the participation of AICC observer Deepa Das Munshi in the discussions.