ദുബായ്: പ്രശസ്ത ഡോക്ടറും ആസ്റ്റർ ഡിഎം ഹെൽത്ത്കെയറിന്റെ സ്ഥാപക ചെയർമാൻ ഡോ. അസാദ് മൂപ്പന്റെ അനുജന്റെ മകനുമായ ഡോ. നാസർ മൂപ്പൻ അന്തരിച്ചു. ഇന്നലെ വൈകിട്ട് ദുബായിലായിരുന്നു അന്ത്യം.
കഴിഞ്ഞ 20 വർഷത്തിലേറെയായി ആസ്റ്റർ ഡിഎം ഹെൽത്ത്കെയറിൽ സേവനം ചെയ്ത അദ്ദേഹം മരണ സമയത്ത് ഖത്തറിലെ ആസ്റ്റർ ആശുപത്രിയിൽ മെഡിക്കൽ ഡയറക്ടറും ഇഎൻടി വിദഗ്ധനുമായാണ് പ്രവർത്തിച്ചിരുന്നത്.
ഭാര്യ: വഹിദ. മക്കൾ: നിദ, നിമ്മി, സെയ്ൻ. ഡോ. നാസർ മൂപ്പന്റെ നിര്യാണത്തിൽ ആസ്റ്റർ ഡിഎം ഹെൽത്ത്കെയർ സ്ഥാപക ചെയർമാൻ ഡോ. ആസാദ് മൂപ്പൻ അനുശോചിച്ചു. മനുഷ്യസേവനത്തിനായി തന്റെ ജീവിതം അർപ്പിച്ച വ്യക്തിയായിരുന്നു ഡോ. നസർ എന്ന് ഡോ.ആസാദ് മൂപ്പൻ പറഞ്ഞു.
അദ്ദേഹത്തിന്റെ ത്യാഗബോധവും കരുണയും അടയാളപ്പെടുത്തിയ ജീവിതം ഖത്തറിലെ ആരോഗ്യരംഗത്ത് അദ്ദേഹം അവശേഷിപ്പിച്ച മുദ്രകൾക്കൊപ്പം എന്നും ഓർക്കപ്പെടുമെന്നും പറഞ്ഞു.
ഖത്തറിൽ ആരോഗ്യസംരക്ഷണമേഖലയ്ക്ക് ഡോ. നാസർ മൂപ്പൻ നൽകിയ സംഭാവനകൾ മായാതെ നിലകൊള്ളും. അദ്ദേഹത്തിന്റെ കരുതലിലും പിന്തുണയിലും ആശ്വാസംനേടിയ അനേകം ജീവിതങ്ങളിലൂടെ അദ്ദേഹത്തിന്റെ ഓർമ്മകൾ എന്നും നിലനിൽക്കുമെന്നും ഡോ. ആസാദ് മൂപ്പൻ അനുശോചനസന്ദേശത്തിൽ പറഞ്ഞു.
