മലപ്പുറം: കഞ്ചാവ് കേസിൽ തമിഴ്നാട് പോലീസ് പിടികൂടി ജാമ്യത്തിലിറങ്ങിയ യുവാവ് മാരക മയക്കുമരുന്നുകളുമായി വീണ്ടും പിടിയിലായി. മലപ്പുറം കൊണ്ടോട്ടി നെടിയിരുപ്പിൽ വെച്ച് ഇന്നലെ വൈകീട്ട് 4 മണിയോടെയാണ് തേഞ്ഞിപ്പാലം സ്വദേശി നൗഷാദലി പോലീസ് പിടിയിലായത്. നാല് ഗ്രാം എംഡിഎംഎയും, ബ്രൗൺ ഷുഗറും യുവാവിൽ നിന്നും പോലീസ് സംഘം പിടിച്ചെടുത്തു.
തമിഴ്നാട് കൊയമ്പത്തൂരിൽ ബേക്കറി നടത്തുന്നതിൻ്റെ മറവിൽ കേരളത്തിലേക്ക് ലഹരി കടത്തുന്നതാണ് ഇയാളുടെ രീതി. ഇത്തരത്തിലെത്തിച്ച മയക്കുമരുന്ന് കാറിൽ കൊണ്ടുനടന്ന് വിൽക്കുന്നതിനിടയിലാണ് പിടി വീണത്. ഇയാൾ ഓടിച്ചിരുന്ന വാഹനവും പോലീസ് കസ്റ്റഡിയിലെടുത്തിട്ടുണ്ട്.
കൊണ്ടോട്ടി ഡിവൈഎസ്‌പി സന്തോഷ്, ഡാൻസാഫ് എസ്.ഐ ബിബിൻ എന്നിയുടെ നേതൃത്വത്തിൽ ഡാൻസാഫ് ടീം അംഗങ്ങളും കൊണ്ടോട്ടി പോലീസും ചേർന്നാണ് പ്രതിയെ പിടികൂടിയത്.
അഞ്ച് മാസം മുൻപ് കഞ്ചാവ് കേസിൽ തമിഴ്നാട് പോലീസ് പിടിയിലായ പ്രതി 2 മാസം മുൻപാണ് ജാമ്യത്തിൽ ഇറങ്ങിയത്. കോയമ്പത്തുരിൽ വച്ച് മുൻപും ഇയാൾ ലഹരി കടത്തുമായി ബന്ധപ്പെട്ട കേസുകളിൽ പിടിയിലായിട്ടുണ്ട്.
