ഇടുക്കി കാഞ്ചിയാറിൽ മേപ്പാറ – പുട്ടുസിറ്റി – കൽത്തൊട്ടി റോഡിൽ ഒരാഴ്ച മുൻപ് ടാർ ചെയ്ത ഒന്നര കിലോമീറ്റർ ഭാഗത്ത് വിവിധ ഇടങ്ങളിൽ ടാറിങ് ഇളകിമാറി. പ്രദേശത്തെ റോഡ് നാളുകളായി റോഡ് തകർന്നു കിടക്കുകയായിരുന്നു. ഗതാഗതം ദുഷ്കരമായ സാഹചര്യത്തിലാണ് കാഞ്ചിയാർ പഞ്ചായത്തിന്റെ നേതൃത്വത്തിൽ തുക വകയിരുത്തി റോഡ് നവീകരിച്ചത്.
ഒരാഴ്ച മുമ്പാണ് റോഡിൻറെ ടാറിങ് ജോലികൾ പൂർത്തിയായത്. എന്നാൽ ദിവസങ്ങൾ പിന്നിട്ടതോടെ റോഡിൻറെ വിവിധ ഭാഗങ്ങളിൽ ടാറിംഗ് ഇളകി തുടങ്ങി. ടാറിങ് മെറ്റലുകൾ കൈകൊണ്ട് വാരി കൂട്ടാവുന്ന സ്ഥിതിയാണുള്ളത്. ടാറിങ്ങിൽ കരാറുകാരൻ കാണിച്ച അഴിമതിയാണ് ഈ സ്ഥിതിക്ക് കാരണമെന്ന് നാട്ടുകാർ ചൂണ്ടിക്കാണിക്കുന്നു.
വേണ്ട വിധം ടാർ മിക്സ് ചെയ്യാതെയാണ് ഈ ഭാഗങ്ങളിൽ പണികൾ ചെയ്തിരിക്കുന്നത് എന്നാണ് നാട്ടുകാരുടെ ആക്ഷേപം. വാഹനങ്ങൾ കടന്നു പോകുമ്പോൾ ടാറിങ് കൂടുതലായിട്ടുള്ള ഇളകി പോകുന്നുണ്ട്. റോഡ് നവീകരണത്തിലെ ക്രമക്കേട് ചൂണ്ടിക്കാട്ടി വിജിലൻസിൽ അടക്കം പരാതി നൽകാൻ ഒരുങ്ങുകയാണ് പ്രദേശവാസികൾ.
