അര്ജുന് ലാലും യുവതിയും തമ്മിൽ മുൻപ് പരിചയത്തിലായിരുന്നു
തൃശൂര്: യുവതിയുടെ വീട്ടിലെത്തി 23-കാരന് പെട്രോൾ ഒഴിച്ച് തീകൊളുത്തി ആത്മഹത്യ ചെയ്തു. തൃശൂര് കുട്ടനെല്ലൂരിൽചൊവ്വാഴ്ച രാത്രിയായിരുന്നു സംഭവം. കണ്ണാറ സ്വദേശി ഒലയാനിക്കല് വീട്ടില് അര്ജുന് ലാലാണ് (23) ആത്മഹത്യ ചെയ്തത്.(23-year-old man suicide in thrissur)
അര്ജുന് ലാലും യുവതിയും തമ്മിൽ മുൻപ് പരിചയത്തിലായിരുന്നു. എന്നാല് ഒരു വര്ഷത്തോളും ഇരുവരും അകല്ച്ചയിലാണ്. തുടർന്ന് കഴിഞ്ഞ ദിവസം അര്ജുന് യുവതിയുടെ ചിത്രം സോഷ്യല് മീഡിയയില് പങ്കുവെച്ചു. സംഭവം ശ്രദ്ധയിൽപ്പെട്ട യുവതിയും വീട്ടുകാരും യുവാവിനെ വിളിച്ച് ചിത്രം നീക്കം ചെയ്യാന് ആവശ്യപ്പെട്ടു. എന്നാല് ചിത്രം നീക്കം ചെയ്യില്ലെന്നും വീട്ടിലെത്തി ആത്മഹത്യ ചെയ്യുമെന്നും അര്ജുന് യുവതിയെ ഭീഷണിപ്പെടുത്തി.
യുവതിയുടെ വീടിനു പുറത്തുവെച്ച് അർജുൻ പെട്രോള് ദേഹത്ത് ഒഴിച്ച് സിറ്റൗട്ടില് കയറി തീ കൊളുത്തുകയായിരുന്നു. ഇതിനിടെ യുവതിയുടെ വീടിന്റെ ചില്ലുകള് യുവാവ് എറിഞ്ഞുടയ്ക്കുകയും ചെയ്തിരുന്നു. വിവരമറിഞ്ഞെത്തിയ ഒല്ലൂര് പോലീസാണ് പൊള്ളലേറ്റനിലയില് യുവാവിനെ ആശുപത്രിയിലേക്ക് മാറ്റിയത്. ഗുരുതരമായി പൊള്ളലേറ്റ അര്ജുന് ലാല് ചികിത്സയിലിരിക്കെയാണ് മരിച്ചത്.
